moult bel ». M.P

logis dudit Baudot de Noyelle, et aussi pour le grant nombre des gens du duc, qui de toutes pars arivoient où la noise estoit, se commencèrent à retraire.

Sy se frappèrent les Bourguignons dedens si très radement que pluiseurs en furent mors, prins et noyez. Et la Pucelle, qui soustenoit, toute la derrenière, les faiz de ses adversaires, y fut prinse par l'un des gens du conte de Ligny, et le frère de la Pucelle et son maistre d'ostel. Laquelle Pucelle fut menée à grant joye devers le duc * , lequel venoit en toute diligence, en l'ayde et secours de ses gens; lequel fut moult joyeulx de la prinse d'icelle, pour le grant nom qu'elle avoit, car il ne sembloit point à pluiseurs de son party que ses euvres ne fussent miraculeuses. Et tantost après ladicte prinse , le duc se logea assés près de la ville de Compiègne. Auprès du logis du duc furent faictes mynes et approches à l'endroit de ung fort bolvercq, qui estoit au pont de la ville, où avoit forte garde. Et là y eult maintes belles escarmuches, tant d'ung costé que d'autre; et si fut le bolvercq tant aprochié que par forces d'armes et de bel assault fut prins, et peu y eult de ceulx qui le gardoient, qui ne fussent tous noyez, mors ou prins.