M. P. — Notre ms. a « livrèrent

furent constrains de donner et délivrer vivres pour l'ost avitaillier, moyennant que on leur payast ; et ainsi fut fait. Puis, de là, s'en allèrent mectre le siège devant ung fort chastel nommé Coursant [et y furent environ viij jours]1. Et furent tant batus de canons et de bombardes [qu'ilz furent constrains] 2 par force d'armes que toute la garnison se rendy prisonniers; et furent enmenés prisonniers plus de lx à iiijxx hommes de guerre.

Durant icelluy siège de Coursant vindrent par sceurté, après leurs sommacions faictes par officiers d'armes, héraulx ou poursuyvans, devers lesdis seigneurs; c'est assavoir, le seigneur de Santour, le capitaine de Venisy, et le capitaine de Saint-Falle; et leur fut accordé tout tel traictié que ceulx de Passy avoient; dont, pour tout ce faire et entretenir, ilz livrèrent bons ostages et seurs. Et, pour ce que ladicte journée du premier jour de septembre approchoit de la reddicion de Passi, comme dit est, iceulx seigneurs de Charny, messire Jehan de Croy et le seigneur de Créquy se retrayrent à Monbar et à l'environ, à tout leur armée, et là actendirent le duc, lequel avoit assemblé une très grande armée de gens de sondit pays de Bourgoingne ; et tant que, à ladicte journée, ilz se trouvèrent ensemble viijm combatans ou environ. Sy vint aussi, en l'ayde du duc, le seigneur de Tallebot, à tout mil combattans anglois ; et si estoit le seigneur de Lille. Adam mareschal de France. Sy est ainsi que, quant ilz furent assemblez tous ensemble, nouvelle vindrent au duc que le seigneur de Chasteau Villain et le damoiseau de Commarsy, adversaires, avoient assiégié une place

1 et 2. M. P.

nommé Bourg, assez près de Lengres, tenant le party du duc. Sy prist le duc conseil quel secours il leur pourroit faire. Si fut ordonné que messire Anthoine de Vergy et le seigneur de Gréquy yroient avec le conte de Fribourg et messire Jehan de Vergy, à tout une grosse et noble compaignie de gens prinse en l'ost du duc, non obstant que la journée estoit le mardi ensuivant que le duc devoit tenir la journée pour combattre devant Passi, comme dit est. Et fut envoyé le secours à Bourg, le prochain dimence devant.

Le duc se tira à ung gros village, nommé Ravières à deux lieues près de Passi ; et, par bonne délibéracion de conseil, fut ordonné que le seigneur de Gharny et messire Jehan de Croy, comme chiefz de l'ost, yroient tenir la place pour le duc devant Passi, et menroient et conduiroient la noble armée du duc et il demouroit audit Ravières, à compaignie de sa noblesse; et ainsi fut fait. Et la cause pour quoy le duc n'alla point au lieu où la journée se debvoit tenir, fut pour ce que les adversaires ne se comparurent point à puissance, à ladicte journée, comme cy après sera dit.

Or, est vray que les seigneurs de Charny et messire Jehan de Croy tindrent la journée, comme dit est, à laquelle nulz ne s'apparut pour combattre; dont la ville et chastel de Passy se rendirent, comme leur traictié le portoit; et en prinrent lesdis seigneurs la possession. Et pareillement se rendirent toutes les villes et forteresses dont cy devant est faicte mencion. Sy furent les hostaiges renvoyés et délivrés, comme raison estoit. Après ceste journée ainsi tenue par le duc, et les choses dessusdictes faictes et passées, il donna congié à la plus grant partie des gens qui là estoient venus à son mandement , et se retournèrent

le seigneur de Tallebot, anglois, le seigneur de Lille Adam, et pluiseurs aultres, à Paris et ailleurs dont ilz estoient partis; et les remercia le duc moult honnourablement, en faisant de moult nobles et rices dons. Et aussi pluiseurs seigneurs de Bourgoingne s'en retournèrent en leurs lieux et maisons; et le duc prinst son chemin à Noyers; et là ordonna, par bonne délibéracion de conseil, qu'il envoyeroit mectre le siège devant une forte ville nommée Chamblires, là où estoient ses ennemis à grant puissance. Et furent chiefz d'icelle armée le seigneur de Gharny et messire Jehan de Croy ; et y furent par l'espasse de vj jours ou environ, que iceulx furent si constrains par force d'armes que ilz se rendirent, saulfz corps et biens.

Or, fault parler de v chevaliers qui tous furent en leurs temps frères et compaignons de la noble ordre de la Thoison d'or : c'est assavoir, messire Jehan et messire Anthoine de Vergy, le seigneur de Neufchastel, le seigneur de Gréqui et le seigneur de Montagu, avec eulx le conte de Fribourg, qui, par le duc, furent envoyez pour lever le siège que tenoient le damoiseau de Gommersy et le seigneur de Ghasteau Villain, et aultres devant Bourg. Et fut leur partement le xxviije jour d'aoust, an dessusdit. Or, est ainsi que, quant lesdis de Chausteau Villain et Commarsy seurent la venue des seigneurs dessusdis, et qu'ilz venoient sur eulx à puissance, ilz levèrent leur siège et se retrayrent dedens la cité de Lengres. Quant les seigneurs dessusdis sceurent leur partement et là où ilz estoient retrais, ilz se mirent après eulx en chemin, et s'en allèrent devant ladicte cité de Lengres, là où ilz furent depuis dix heures du matin jusques à

vij heures du vespre ; et là y eult de grandes armes et escarmuches faictes. Après, partirent iceulx seigneurs de là et allèrent mectre le siège devant une forte place, nommé Chauvenchy, là où il y avoit dedens environ lx combatans, lesquelz se rendirent, saulfz corps et biens. Sy fut conclud par lesdis seigneurs de abattre ladicte place, laquelle appertenoit au seigneur de Chasteau Villain ; et fut abbatue et toute démolie. Après, envoyèrent iceulx seigneurs sommer une aultre place nommée Villers appartenant pareillement au seigneur de Chasteau Villain, lesquelz se rendirent, et mirent les gens en la main du duc.

Après toutes icelles choses faictes, s'en retournèrent iceulx seigneurs tous en leurs hosteulx, réservé le seigneur de Gréquy qui s'en vint logier à Jumeaulx , ung gros village à iij lieues près de Dijon, et y mena ses gens pour ce que il avoit ouy nouvelles que le seigneur de Chasteau Villain y vouloit bouter les feux. Sy se y tint par l'espasse de trois jours pour garder ledit village ; mais nulz ne s'apparut pour ce faire. Le duc manda le seigneur de Créquy qu'il venist vers luy hastivement en la ville d'Époisse, pour conclure à ses affaires, et pour aller devant Avallon, comme cy après sera dit.