CHAPITRE CLXXXV

Comment le duc print la ville d'Avallon d'assaulx, et aussi la forteresses de Pierrepetruis.

Après les choses dessusdictes faictes et passées, le

duc se party de Noyers et tira son chemin vers Espoisse, laquelle siet en son pays de Bourgoigne, là où il se tint une espasse de temps ; et là fut conclud et délibéré, par noble conseil, d'aller mectre le siège devant la ville d'Avallon, là où il avoit grant garnison de ses adversaires, jusques au nombre de iijc ou environ ; lesquelz avoient prins et emblée ladicte ville, et faisoient moult de dommages ou pays de Bougoingne. Sy furent ordonnez les chiefz et gouverneurs du siège, le seigneur de Charny et messire Jehan de Croy, lesquelz tindrent le siège d'un costé de la ville; et de l'autre costé fut ordonné le seigneur de Créquy avec les seigneurs de Ghastellus, le seigneur de Prébles, Le Bastart de Saint-Pol et le seigneur de Humières. Et dura icellui siège iij sepmaines ou environ ; auquel terme la ville et muraille fut moult travaillie et adommagie de bombardes et canons, et moult de gens mors et navrés, tant par traict d'artillerie comme aultrement. Pour laquelle cause on commença à parlamenter les ungs aux aultres, en demandans à ceulx de dedens pluiseurs grandes demandes, tant de la réparacion de la ville comme de rendre aultres places et forteresses prinses et tenues de ceulx de leur party ; à quoy nul traictié ne s'i povoit trover. Et advint que, en iceulx jours que on parlamentoit, ung grant pan de mur de ladicte ville, lequel avoit esté fort batu de bombardes, chéy es fossez; dont ceulx de l'ost, qui ce veirent, furent moult joeulx et cryèrent « à l'arme ». Et adont, sans nulle ordonnance et oultre le commandement du duc, qui par pluiseurs foiz avoit deffendu que on ne l'assaillist point, iceulx de l'ost assaillèrent bien asprement et radement. Auquel assault il y eult moult de

cens mors et navrez d'un costé et d'aultre. En telle manière fut assaillie que, par forée d'armes, il couvint retraire les assaillans et faillèrent à leur emprinse. Et ce non obstant, ceulx de la ville, après la retraicte faicte, se mirent ensemble, pour eulx conseiller qu'ilz avoient affaire. Et ainsi que à ix heures de nuyt, doubtans que de rechief ilz ne fussent assaillis, et aussi que ilz ne pouroient payer les grans demandes que on leur avoit icellui jour faictes et demandées, sy conclurent de eulx en aller et abandonner la ville. Et à icelle heure, ilz firent secrètement deffermer une petite posterne pour eulx enfuyr. Sy saillirent moult radement, tant à cheval comme à pied. De laquelle saillie le guet de l'ost se perceut, et cryèrent « à l'arme ». Et là y eult une grant mortalité à l'assembler ensemble, tant d'un costé comme d'aultre ; et en eschappa xxx, ou environ de ceulx de dedens ; et le surplus, par force d'armes, furent reboutez dedens la ville, et ceulx de l'ost avec eulx. Et mesmes, par les murailles tant abattues comme droictes et par force d'assaulx, prinrent la ville et mirent tout à sacquemant. A laquelle entrée furent prins ijc prisonniers et iiijc chevaulx de selle, et grant foison de gens mors et navrés, comme il est de coustume faire en pareil cas.

Icelle concqueste et prinse d'Avallon faicte, le duc entra dedens et visita ladicte ville, laquelle il trouva [fort adommagie par les bombardes et canons; et sy trouva] i iceulx ijc prisonniers, lesquelz eulrent tel traictié avec le duc que, pour leurs vies saulver et avoir délivrance de prison, ilz firent rendre, en l'obéyssance

du duc, Mailly La Ville, Mailly Le Chastel et Saint-Vry, emplies de grosses garnisons et qui moult avoient adommagié le pays d'environ. Toutes lesquelles garnisons se partirent; et, par ainsi, lesdis prisonniers furent quictes et mis à délivrance, comme raison estoit.

Après icelles choses faictes, le duc s'en tira à Véselay, là où il séjourna jusques au jour des âmes et envoya mectre le siège devant une forteresse nommée Pierre Petruis. Le duc se party de Véselay et vint audit siège de Pierre Petruis. S y fist visiter la place et trouva que la basse court estoit imprenable d'assault; mais néantmoins ilz assaièrent l'endemain au point du jour, moittié emblée, moittié assaulx. Sy l'assaillirent1 et emportèrent d'assaulx, et par force d'armes ilz poursuirent et continuèrent si radement leur emprinse qu'ilz les firent retraire au donjon; et là, le duc fut des premiers montans au bolvecq et entrant ens la basse court. Sy furent si constrains iceulx adversaires qu'ilz traictèrent d'eulx partir, saulfz leurs biens, et ung baston en leur mains, et avec ce de rendre tous prisonniers qu'ilz avoient en leur povoir, là où qu'ilz fussent, avec une bonne ville et chasteau nommé Crevant; et ainsi fut fait et acomply.

Or, est vray que en toutes les emprinses faictes et conquestes advenues depuis la venue du duc de Bourgoingne en icelluy sondit pays, le seigneur de Charny a esté et estoit tousjours gouverneur du pays de Bourgoingne, ayant povoir de pardonner à tous malfaicteurs, abollir et recevoir hommes, places, villes et forteresses, de donner saulfconduis et de faire toutes