CHAPITRE CLXXXVI

De la troisiesme feste et cappitre de V ordre de la Thoison d'or tenue à Dijon, où les nombre des chevaliers fut acreu de six.

La vigille Saint-Andrieu, mil iiijc xxxiij, devant la solempnité des vespres, fut tenu chappitre de l'ordre, ou chappitre de la chappelle des ducz à Dijon ; et y fut procédé aux élections qui estoient à faire, pour ce

que le nombre des chevaliers qui estoient là présent estoit petit, et pour remplir les lieux de viij chevaliers qui estoient à eslire : c'est assavoir, le premier, ou lieu de messire Régnier Pot, au lieu duquel l'an précédent avoit esté esleu messire Andrieu de Toulonjon, qui, avant que son élection lui fust signiffiée, estoit trespassé au retour du voyage de la Terre Saincte; le second, ou lieu du conte de Saint-Pol, trespassé depuis le précédent chappitre, et six aultres qui furent mis de creue; car, la première ordonnance, ne furent que xxv chevaliers; et, depuis, fust advisé que on en mecteroit encoires six qui feroient le nombre de xxxj.

Ainsi y eult, à ce chappitre, viij chevaliers esleuz dont les noms s'ensievent : c'est assavoir, le seigneur de Créveceur, messire Jehan de Vergy, messire Guy de Pontaillier, messire Baudot de Noyelle, messire Jehan, bastard de Saint-Pol; le conte de Carrollois, seul filz du duc, souverain dudit ordre ; le conte de Warnembourg et le seigneur de Neufchastel. Lesquelz viij chevaliers esleuz furent très joeulx de leur élection, receurent agréablement le collier, firent le sérement audit lieu de Dijon appertenant à faire, comme il est déclairé es chappitres dudit ordre.