CHAPITRE CLXXXIX

Comment le due de [Bourgoingne] envoya gens de guerre gaster le pays de Beaujulois; et comment il retourna en ses pays de Flandres et de Brabant.

Tantost après icelle feste, le duc retourna à Dijon ; et fut le xvhje jour du mois de février, où il fist assembler pluiseurs gens de guerre, lesquelz il ordonna à estre en la compaignie du Bastard de Saint-Pol, et de messire Baudot de Noyelle ; et les envoya au pays de Beaujulois et es marches d'environ . Et entrèrent èsdis pays de Beaujulois lesdis seigneurs et y firent de grans dommaiges; et prinrent pluiseurs forteresses et

boutèrent les feux en pluiseurs lieux. Sy ne trouvèrent nulz qui se oftrist à les combattre ; et ainsi retournèrent en Bourgoingne. Le derrain jour de mars, se party le duc de Dijon, pour aller en ses pays de Brabant, de Flandres, Artois et Haynnau. Or, est vray que, avant son partement, le duc ordonna, par bonne délibération de conseil , que la ducesse demouroit es pays de Bourgoingne, ayant le gouvernement des dessusdis pays ; et messire Anthoine, et messire Jehan de Vergy seroient capitaines dudit pays. Après icelles ordonnances, se party le duc, pour retourner en Flandres, et arriva en sa ville d'Arras le xvije jour d'apvril enssuivant, mil iiijc xxxiiij ; et de là à Lille, Bruges et Gand, et en pluiseurs aultres villes. Et, en ce temps, prinst le conte de Ligney une forte abbaye nommée Saint-Vincent auprès de la cité de Laon ; et estoit ladicte abbaye si près de ladicte cité que de canons et serpentines ilz jectoient, tous les jours, l'un dedens l'autre. A merveilles coustoit audit conte de Ligney à garder icelle place, en espérant de mectre ceulx de la cité en subgection. Mais, riens n'y valut; ains par certain appoinctement se party le conte de Ligney de ladicte place, et furent ceulx de ladicte cité forcez d'abattre icelle forteresse. Laquelle chose ilz firent à grant desplaisance; et fut toute démolie.