en la main ». M. P

bagues. Ceulx de la ville, qui vauldrent demourer, demeurèrent ; et leur accorda-on tous leurs biens meubles. Mais les vivres furent davantage pour la garnison qui y entra. Et y furent mis en garnison le seigneur de Charny, Anthoine et Guillame de Vendre et pluiseurs aultres. Le duc, pour l'hiver qui approchoit, s'en alla à Challons et leissa grosse garnison à Mascon, qui coururent tout le pays de Dombes et y prindrent pluiseurs places. Et, quant au duc de Bourbon, il se tenoit à Villefrance.

Ne demoura guaires de temps, après, que une journée, pour traicter de la paix entre le duc et le duc de Bourbon, se print ; et assemblèrent leurs gens ensemble en la ville de Belleville. Mais, quant les dessusdis furent assemblez en ladicte ville, les gens du duc de Bourbon se boutèrent à vouloir soustenir que le duc de Bourbon venoit de la lignie saint Loys, et devoit aller devant le duc. Pour laquelle cause on se partit sans riens faire. Tantost après, à l'eure que on entendoit la chose estre en plus grant aigreur et plus ennemie que devant, le duc de Bourbon envoya devers le duc requerre ung saulf conduit pour ung chevalier de son hostel, nommé messire Gasconnet, son maistre d'ostel, pour aller devers le duc; auquel il fist de si belles offres de par le duc de Bourbon, pour venir à paix, que journée fut accordée et prinse de eulx assembler à Nevers, à certain brief jour enssuivant. Icelle journée accordée, le duc renvoya son armée. A icelle journée de Nevers, assemblèrent le duc et le duc de Bourbon et les dames de Bourgongne et de Bourbonnois, aussi le connestable de France et pluiseurs

princes, barons, chevaliers et escuiers ; et là firent grant feste les ungs aux aultres. Et si grant chière faisoient qu'il sembloit que jamais n'eussent eu guerre ensemble ; et dès la première nuyt souppèrent les princes ensemble en la chambre du seigneur de Croy, et aussi pluiseurs chevaliers et escuiers. Mais ne fut mie sans boire d'autant ; et toulloient les couppes et tasses les ungs aux aultres; et là disoient pluiseurs sages, qui les regardoient faire tel chière et de si bon ceur, qu'il estoit fol qui en guerre se boutoit et se faisoit tuer pour eulx. Le duc et la dame de Bourbonnois, sa propre seur, s'entrefaisoient grant chière, et grant liesse demenoient. Là, y furent faiz pluiseurs beaulx bancquetz et belle danses. Après, fut conclud que une journée se tenroit en la ville d'Arras, à la Saint-Jehan de lors prochain venant, pour la paix pour le royaulme de France, entre le roy Charles, VIP de ce nom, et le duc.

Après pluiseurs festoiemens et bonnes chières faictes, le duc et le duc de Bourbonnois et pluiseurs aultres princes qui là estoient, s'en retournèrent en leurs pays. Et, quant au duc et à la ducesse, et leur filz de Gharrollois, retournèrent en Picardie, Flandres, Brabant, et cetera. Et print le duc son chemin par la ville de Paris et fist savoir à Messire Jehan de Croy, au seigneur de Saveuses et aultres, qu'ilz fussent au devant de luy ; lesquelz le firent, à tout belle et grant compaignie de gens d'armes et de traict ; et furent au devant de luy jusques en la ville d'Auxoire.

Le duc fut par aucuns jours en la ville de Paris, où il et sa compaignie firent très grant chière ; et, de

Paris, s'en alla en ses pays dessusdis, où il fut besoingnans en ses affaires, jusques à la journée et convencion d'Arras.