CHAPITRE CXX

Comment le duc Phelippes de Bourgoingne combatit les Daulphinois , et gaingna la battaille qui fut nommée la bataille de Mons en Vimeu.

Or fault retourner à parler du duc. Vray est que.

luy estant en la ville de Mante et Gisors, le seigneur d'Offemont et Potton de Saint-Traillies assemblèrent de mil à xijc chevaulx, et par le moyen de sire Jaeques de Harcourt, capitaine de la ville et chasteau du Grotoy, entrèrent dedens la ville de Saint-Ricquier ; et lors commencèrent courre le pays et faire maulx innumérables, et prindrent la forteresse de Douvrières par laquelle ilz couraient devant Monstreul et par tout le pays.

Quant le duc sceult ces nouvelles, il fut délibéré d'aller mectre le siège devant Saint-Ricquier ; laquelle chose il fist. Le duc povoit avoir en sa compaignie de cincq à vjm combattans, lesquelz faisoient maintes belles escarmuches devant ladicte ville. Le seigneur d'Offemont,' qui dedans la ville estoit asségié, avoit ung frère nommé Loys de Néelle, lequelle, sachant son frère estre asségié du duc, fist une grande assemblée pour secourre et aidier son frère qui asségié estoit. Le duc sachant que les Daulphinois le venoient combattre eult conseil de lever son siège et aller au devant d'eulx, et se party de devant Saint-Ricquier le penultisme1 jour d'aoust et prist son chemin droit à Abbeville ; et là burent et mengérent aucuns de ses gens, tous à cheval, affm d'estre plustost prestz se aucunes nouvelles leurs venoient de ses gens qu'il avoit envoyé chevauchant le pays de Vimeu, en tirant devers Oisemont.

Or, est vray que, entre le point du jour et soleil levant, veyrent et appercheurent les Daulphinois qui en belle ordonnance s'en alloient moult radement en