L. Notre, ms. a « dépendirent

de sa main deux nobles hommes ; et messire Jehan de Luxembourg chassa tant et si longuement ses ennemis qu'il fut prins et découppé de ses ennemis. Mais enfin il fut reseoux.

Que vous diroye-je? La bataille fut bien combattue; mais l'onneur et victoire en demoura au duc; et là furent prins des Daulphinois pluiseurs nobles hommes ; assavoir Loys d'Auffemont; le seigneur de Conflans; messire Gilles de Gamaches et son frère; Poton de Saint-Trailles ; le marquis de Sève et son frère; le seigneur de Thenbronne et pluiseurs aultres gentilshommes, jusques au nombre de vjxx. Et si furent mors sur la place de vj à vijc hommes d'un costé et d'aultre, dont on disoit que de la partie de Bourgongne n'estoient mors que xx à xxx hommes; entre lesquelz estoit le seigneur de la Viésville.

Après ces choses achevées par le duc, il s'en ralla à giste à Abeville où il fut très honnourablement receu et toute sa compaignie. Après qu'il ot séjourné cincq ou vj jours à Abeville après icelle bataille, qui fut nommée « la battaille de Mons », pour ce que icelle avoit esté assez près d'un village nommé Mons en Vymeu, le duc délivra les deux nobles hommes que il avoit prins de sa main et leur quicta leur fois, et leur donna cheval et harnas; et avec ce, leur donna à chascun vc pièces d'or que, à ce temps, on nommoit moutonceaulx. Et, au regard des aultres nobles hommes , seigneurs et capitaines daulphinois qui avoient esté prins à ladicte bataille, se fîst ung traictié tel que, moyennant la reddicion de la ville de Saint- Ricquier, qui réallement fut remise en la main du duc, iceulx nobles hommes et capitaines furent tous délivrez

sans payer finances. Et en fut ordonné capitaine messire Phelippes de Fosseux dit Le Borgne; et le seigneur d'Offemont s'en alla de ladicte ville , luy et toutes ses gens, ainsi que ledit traictié le portoit.