CHAPITRE CXXII

Comment le duc partist de Flandres, pour aller en son pays de Bourgoingne, en passant par Paris au Bois de Vincesnes où estoit le roy et la roynne; de là alla au siège de Meaulx; et comment il alla visiter le duc et la ducesse de Savoy e, son bel oncle et sa tante : et comment le conte de Conversen fut délivré de prison, et aussi fut Arthus, conte de Richemont, frère du duc de Bretaingne.

En ce temps mesmes, après la feste de la Nativité de Nostre Seigneur, le duc se party de sa ville d'Arras où il leissa la ducesse, sa femme, fille du roy. Là, prindrent congié l'un de l'autre ; mais, oncques depuis ne se veyrent ; car elle morut en brief temps après le partement de son mary. Or s'en party le duc, en sa compaignie le conte de Saint-Pol et pluiseurs aultres, chevaucha et exploincta tant qu'il se trouva en la ville de Paris ; puis ala vers le roy et la royne qui au Bois de Vincesnes estoient. Le duc ne séjourna guaires à Paris et s'en alla devers le roy d'Angleterre qui tenoit le siège devant Meaulx, ainsi que devant est dit. Le roy d'Angleterre le receut moult honnourablement, et moult joyeulx fut de sa venue; et tindrent grans consaulx ensemble pour le affaires du royaulme. Le duc ne séjourna guaires avec le roy d'Angleterre et s'en alla en son pays de Bourgoingne, où il n'avoit point esté puis la mort de son feu père, veoir la ducesse, sa mère et ses seurs, desquelles il fut receu à grant léesse.

Ses hommes et vassault luy leirent les saremens acoustumez à faire. Le due fut fort festoyez, de ses subgetz, de joustes et d'esbatemens pluiscurs à sa joyeuse venue. Après, s'en alla le duc ou pays de Savoye veoir son bel oncle et sa tante, les duc et ducesse de Savoye ; et, ce fait, retourna en Bourgoingne.

Or est vrai que durant le temps que le roy d'Angleterre tenoit son siège devant la ville de Meaulx, vint devers luy, à privée maisnie, messire Jehan de Luxembourg pour traictier de la délivrance du conte de Conversen, son frère, lequel jà, par longtemps, avoit esté prisonnier, et encoires estoit dedens icelle ville, à Pièron de Luppé. Et, luy venu là, fist et traicta tant par l'ayde et moyen du roy d'Angleterre, que son frère fut délivré de prison, moyennant certaine grande somme de pécune qui fut promise à payer et délivrer à Pièron de Luppé à jour assigné. Et, depuis sa délivrance, demoura icelluy conte au service du roy d'Angleterre durant le siège de Meaulx; et messire Jehan de Luxembourg retourna en Picardie dont il estoit capitaine général, et, en sa compaignie, messire Hues de Lannoy qui nouvellement avoit esté constitué maistre des arbalestriers de France, de par les deux roix de France et d'Angleterre. Ouquel an, la roy ne d'Angleterre, acoucha en Angleterre, d'un fîlz qui, par l'ordonnance de son père, fut nommé Henry sur les fons ; et, avec les aultres qui à ce commis estoient , le leva la ducesse de Brabant, qui alors estoit en Angleterre. Pour la nativité duquel filz fut menée très grant liesse en Angleterre.

En ceste mesme année et saison, par certain traictié, fut délivré, des prisons du roy d'Angleterre, Arthus,

conte de Richemont , frère au duc de Bretaingne ; et après sa délivrance, alla à tout gens d'armes au siège de Meaulx servir le roy d'Angleterre , ouquel service il demoura, la vie d'icellui roy d'Angleterre.