Cour s s y ». M. P

cntour leurs corps. Aultres tenoient espées nues par le milieu , les poinctes contre leurs ventres , et chevauchoient ainsi parmy Paris jusques à l'ostel de Tournelles. En ce point furent présentés au régent qui estoit léans avec sa femme ; laquelle, ayant pittié des maleureux, fist tant devers son mary que ilz eulrent rémission; car, aultrement ilz eus[sen]t esté tous mors.

Entre ces choses, une compaingnie d' Anglois yssans de Normandie, prindrent le chastel de Noyelle sur la mer. Adont manda messire Jacques de Harcourt ceulx qui tenoient le chastel de Reu pour aydier à deffendre le Crotoy, lesquelz abandonnèrent Reu ; et les Anglois, tantost après, entrèrent dedens; dont furent ceulx du Crotoy forment travailliez des Anglois qui se tenoient à Saint-Walery , à Noyelle et à Reu. Et oultre plus, les Anglois, en grant puissance, vindrent par mer, la veille Saint-Jehan Baptiste, et par terre; et puis assiégèrent le chastel du Crotoy où estoient messire Jacques de Harcourt et ses gens, qui se deffendirent moult vaillamment.