CHAPITRE LVHI
Des services et obsèques que le roy feist faire solempnellement pour dé fane Loys^ duc d' Orléans j son frère.
En icelle année, le samedi veille des Roix, le roy fist faire solempnellement le service et obsèque de défunct Loys, duc d'Orléans, son frère, en l'église cathédralle de Nostre-Dame de Paris, qui encoires n'avoit esté fait, présent le duc d'Orléans, et le conte de Vertus, et les ducz de Berry, d'Alenchon et de Bourbon, et pluiseurs aultres, tous vestus de noirs habis. Le duc de Guienne, filz du roy, s'estoit party le jour devant, pour aller veoir la royne, sa mère, et sa seur, la ducesse de Bretaingne, qui estoient à Melum ; et ne fut point à iceiluy service. Auquel service prescha le chancellier de ladicte église de Nostre-Dame, nommé maistre Jehan Gerson, docteur en théologie, en recommandant le feu duc d'Orléans ; disant que la gouverne du royaulme par luy
administré, en son vivant, estoit meilleur comme celuy qui depuis y avoit esté. Ouquel sermon il sembloit que il voulsist plus esmouvoir la guerre que appaisier contre le duc de Bourgoingne. Et disoit que pas il n'ennortoit ne conseilloit la mort du duc de Bourgoingne, ou destruction; mais icelluy devoit estre humilié pour recongnoistre son péchié, en faisant digne sattisf action, et par conséquent la salvacion de son âme.
En oultre, dist que l'exécution faicte , au quaresme derrain passé, devant la porte de l'église de Nostre- Dame, de la proposition jadis faicte et proposée par maistre Jehan Petit au conseil de France, pour le duc de Bourgoingne, contre le duc d'Orléans deffunct, comme mauvaise et faulse, avoit esté bien faicte, et que encores n'avoit-on fait comme il appertenoit; et, comme il dist, estoit prest et appareillié de ce soustenir par tout et contre tous.
Le roy estoit en ung oratoire emprés l'autel, du droit costé, sans habit noir. Auprès de luy estoit le duc d'Orléans, devant tous aultres, pour la cause du service de son feu père; puis le duc de Berry, le conte de Vertus et pluiseurs aultres en belle ordonnance. Après lequel sermon, les ducz d'Orléans et de Berry, et le conte de Vertus, recommandèrent au roy le prescheur. Et, le lundy ensuiant, le roy fist faire ung pariel service pour le duc d'Orléans en la chappelle des Célestins de Paris, en laquelle il fut enterrez, présent les dessus nommez; et prescha maistre Jehan Courte Cuisse, docteur en théologie, en ensuiant le propos de maistre Jehan Gerson. Pareillement, le roy fist faire encores ung service, comme dessus, pour le deffunct duc
d'Orléans, ou colliége de Navarre en Paris, en la chappelle du lieu, présent ses parens dessus nommez.
