CHAPITRE II

COMMENT LE CONTE RAUDUIN DE HAINAUT ET DE FLANDRES FUT FAIT EMPEREUR DE CONSTANTI- NOELE.

Le marquis de Montferrant et les aultres barons l'emportèrent au moustier; et trois semaines après Pasques, l'an de grâce mille deux cents et cinq, le portèrent à l'église Sainte-Souffie que la pluspart de ceulx de dechà appellent Sainte-Sophie ; et là fut à moult grande solempnité de ceulx de l'église et des barons couronné comme empereur; et luy firent homage ceulx à qui on avoit aucune terre assignée en l'empire. Et quant l'empereur Bauduin eult une espasse séjourné à Constantinoble après son couronnement, il s'appresta et chevaucha à grant compaignie de gens parmy la terre de l'empire, et print toutes les bonnes villes, les chasteaux et toutes les forteresses; ne ne trouva qui contre lui allât fors qu'ung seul homme qu'on appeloit Johannis, qui estoitroi de Blakie. Celuy Johannis le tint sy court que moult lui livra d'ententes. Et eult en l'ost de l'empereur Baudoin plusieurs

fois grant famine ; et sy n'ozoient en fourage aller pour les gens qui s'estoient rebellez quand ils virent qu'ils eurent Johannis à chievetaine (chef); car ils le amoient mieulx que les Franchois; et s'estoient presque toutes les villes et les chasteaus de l'empire de Constantinoble tournés par devers lui.