MUID ANNUEL DE BLÉ
A° 1546, pénultième Février.
(Archives de Cossonay. — Collationné à l’original.}
Nous l’Advoyer et conseil de Berne faysons scavoir par ces presentes Qu'’avons entenduz la suplication des nobles, discrets nous chers et feaulx soubgects de Cossonay, contenante que fust de nostre playsir, leur donner la mayson de la chappelle de sainet Sebastien pour en Icelle loger le maistre d’escolle, et tenir en [celle l’escolle, pareïillement de donner a leur hospital pour entretenement des pouvres, les revenus de la chappelle de nostre dame, fondée par les seigneurs du diet Cossonay Aussy le fourage du vin, que l’on vend au diet Cossonay, Surquoy estans informé par nostre balliff de Morges, sur les dicts pointz, auquel sy devant avons touchant ce escript, Avons es dicts de Cossonay accordé, et donné, et par ces présentes de singulliere grace accordons, et donnons, la diete mayson de la chappelle sainet Sebastien pour en Icelle tenir l’escolle, et louger le maistre d’escolle, par condition que Icelle maintiegnent en bon estre et ediffice, à leurs coustes, Item avons
aussy donné à leur hospital ung mys de blef, mésure de Morges tous, et ung chescun an, a deslivrer par nostre chastellain de Cossonay sur le Jour saint André, pour entretenement des pouvres du dict hospital et ce tandy que bon nous semblera , Et jusques ad ce que ung des prestres, de la clergie, alle de vie en trespas, et non plus oultre, En tesmoignage de quoy leurs avons données ces présentes scellées de nostre scel pendant et données ce sambedy penultième jour de febvrier, l’an apres la natiuité nostre Seigneur courant mill cinq cens quarante et six
(Sceau de l'Etat.)
LL. EE. DE BERNE CONFIRMENT LA FRANCHISE RÉCIPROQUE DE PÉAGE DES VILLES DE LAUSANNE, COSSONAY, ORBE ET YVERDON.
A° 1552, 22 Décembre.
(Archives de Cossonay. — Collationné à l’original.)
Nous l’Advoyer et conseil de Berne, faisons seavoir par ces presentes, Que sur la requeste a nous cy-devant presentée par les nobles nos chers et féaulx Bourgeois et communaultés des villes Orbaz, Yverdun et Cossonay, touchant le peage de Cossonay Et les proposites d'un procès et Actes d’aucunes Informations En l'an mille quattre cents septante quattre, Aussy des autres
Informations et examens par nostre Ballif de Morges Anthoine Vygerman de nostre commandement faitts, Ayons commandé et ordonné à Nostre cher et feal Général commissaire Nicolas Zur Kinden de regarder icelles Informations Examens et Actes Et en briefve substance nous relater le contenu d’Icelles, Ce que Auiourd'huy a fait, Quoy tout bien entendu, aussy ce que les commis de Lausanne, Yverdun, Cossonay et Orbaz Auiourd'huy Nous ont proposé, Et sur ce avons ordonné et déclaré, Que les Bourgeois et habitants des dittes villes Lausanne, Cossonay, Orbaz et Yverdon, de tout ce qu'ils conduiront sur les marchés Et vendront es dittes villes, lung l’autre, Et en leurs propres maisons Employeront, Et en icelles villes demeureraz, Que de ce ils ne soyent tenus de payer péage, Aïns de toutes autres marchandises qu'ils conduiront d’Estranger pays, comme de france, Bourgongnie, flandre, Jtalie et autres lieux, aussy des dittes villles, par Nostre seignorie de Cossonay, Lesquelles seront menées plus oultre et hors de dittes villes, que d'Icelles soient tenuz à nostre peageur de Cossonay, payer le péage accoustumé comme aultres marchandises, En ce nous reservant, Que si a ladvenir trouvions la sentence donnée sur le dict affaire et examen faissants a nostre proffit, ou aultres tiltres contrarians à icestes de pouvoir revocquer ce present oultroy, Au tesmoing dequoy, Avons selées ces presentes de nostre seel pendant et a une chescune des dictes villes donné unes, Ce Jeudy Vingt deuxiesme jour du moys de Decembre, l'an de grace courrant mille cinq cents
cinquante deux.
(Sceau de l'Etat.)
