HA

LL. EE. DE BERNE INVITENT LA VILLE DE COSSONAY A AUGMENTER LA PENSION DE SES MINISTRES.

A° 1583, 21 Mars.

(Archives de Cossonay. — Collationné à l’original.)

L'advoyer et conseil de la ville de Berne Aulx nobles, honnorables et discret Chastellain et bourgeois de Cossonay salut. Nous ayant l’evidente necessité de la pluspart des ministres dépendans nuement de nous occasionné d'augmenter leurs annuelles pensions Avons incontinent après entendu de rechief les plaintes de ceulx qui ont et receoipvent leur pension des Seigneurs Banderets, ayants la collature de leurs Eglises, avec remonstrance, qu'ils ne sont moings necessiteulx ny exempts de peyne et laboeur, que ceulx auxquels avons faict dicte augmentation Mais nous estant pour lors et encores de present Incommodé pour aultres affaires urgentes qu'avons sur bras a leur pourveoir avons remis le remede de telz plainctifs, Jusques apprès Pasques prochaines, en confiance qu’aurez mesme commeseration de ceulx qui sont en vostre charge et ne ferez difficulté d’accroistre de quelque chose leurs pensions comme de nostre costé serons encleins ou la necessité

le requerra, et trouverons expedient d'adjouxter aussy du nostre, Parquoy Vous mandons, que pour traicter de cest affaire et entendre nostre bon advis vous ayez a envoyer commis en ceste nostre ville sur lundy XXII° d'Apuril prochainement venant, En quoy ferez vostre debvoir et à nous service, De Berne ce XX[ de mars l'an 1583.

Aux nobles, honnorables et discrets nos chers et feaulx Chastellain et bourgeois de Cossonay.