CHAPITRE XII

Cy conclud comment homme ou tant y a de vertus doibt bien estre honnoré.

Par ce qui est dict, qui est chose vraye, peult-on juger si l'homme en qui toutes vertus s'assemblent est digne de los, et d'avoir gloire au ciel, et hault renom au siècle. O quelle chose seroit-ce qui luy pourroit nuire? Certes nulle, quoy que les mouvemens de fortune soyent merveilleux, et qui souvent nuisent aux bons et aux vaillans : si n'est-il mie en la puissance d'elle de briser ne fleschir son fort et ferme couraige, pour quelconque advanture. Car il est ja tout advise' que fortune se peult changer, et que trop peu de fois est stable ; ains souvent reçoit les honneurs et biens mondains que elle a prestez, et au lieu livre et donne maintes adversitez. Si ne luy pourroit advenir cas dont il ne soit tout pourveu de volonté de le porter constamment et patiemment , comme il affiert

à tout saige et vaillant homme. Mais quoy que fortune nuise et ait nuit à maints vaillans, les vertus ne peult-elle tollir. Si ne perd rien l'homme qui ne les perd. Car autres biens ne sont proprement siens.

Et ce sçait bien le saige dont nous parlons. O quantes fois par divers cas que je laisse à dire pour cause de briefveté , a-il esté en péril d'estre trahy, pris, et occis, et empoisonné au pays de delà, où les mauvais , qui tousjours hayent les bons , si les plus forts eussent esté et feussent en la cité de Gennes , ne l'eussent laissé jusques à ceste heure si longuement au gouvernement ? Mais de eulx se sçait-il bien garder. Toutesfois oncques homme ne feut tant saige qui de traistre privé se peust tousjours garder. Et on ne sçait aulcunes fois lesquels ce sont. Car souvent advient que les plus grands flateurs, et les mieulx servans, et qui plus semblent obeissans, sont les plus desloyaux en couraige. Mais de machination , et de faulse œuvre de traistre le veuille Dieu deffendre. Car grande perte seroit et grand dommaige si encombrier luy advenoit. Si ne le veuillez mie souffrir bons Genevois, ne estre ingrats ne mescongnoissans des grands biens qu'il vous a faicts, et chascun jour faict. Et ne le souffrez mettre au compte de ceulx qui ont esté hays pour bien faire. Car à tousjours seroit grand reproche à vous et à vostre cité.