TEXTE H" MANUSCRIT D

i . Segneur. sachiés que mil et cent quatre vint et dis set ans apriès l'incarnation Ihesu Crit. au tans Innocent l'apostole de Rome, et Phelippon roi de France, et Richart roi d'Engleterre , ot un saint home en France qui ot non Fouques de Nuelly (cil Nuellys siet entre Nuelly sour Marne et Paris); et il estoit priestres , et tenoit la perroche de la ville. Et ichil Fouques dont je vous di commencha à parler de Diu par France et par les autres pais entour ; et sachiés que Nostre Sires fist maintes bieles miracles pour lui.

2. Et tant que la renommée de cel saint home ala tant qu'ele vint à l'apostole de Rome Innocent : et l'apostoles manda en France au saint home que il preechast des crois par s'auctorité. Et apriès ienvoia un sien cardonnal.maistre Pieron de Capes, croisié; et manda par lui le pardon tel com je vous dirai : Tout chil qui se croiseroient et feroient le siervice Diu un an en l'ost seroient quite de toz lor pechiés qu'il auraient fais dont il seroient confiés. Pour chou que chius pardons m si grans. si s'en esmurent molt li cuer des gens, et molt s'encroisierent pour chou que li pardons estoit si grans.

3. En l'autre an apriès que chil preudom Fouques parla de Diu^ ot un tornoi en Champaigne, à un castiel qui a non Aicri ; et par la grâce de Diu si avint ke Thiebaus, quens de Champaigne et de Brie . prist la crois , et li cuens Looys de Bloys et de Chartaing ; et che fu à l'entrée des Avens. Et chil cuens Thiebaus estoit jouenes hom et n'avoit pas plus de vint deus ans ; ne li cuens Loovs n'avoit pas plus de vint set ans. Chil doi conte ierent neveu le roi de France et cousin germain, et neveu le roi d'Engleterre de l'autre part