T^lantin à Charles Tisnacq

A Monsigneur Monsieur Ch. Tisnacq, Président au conseil Privé du Roy nostre sire, etc.

Monsigneur très honoré,

Par les lectres de Sa Majesté que j'envoye icy pour tesmoignage, V. S. peut voir ce qu'il pleut à Sadicte Majesté m'ordonner, il y a jà quatre ans ou peu s'en faut, touchant l'impression des Bibles en Hébrieu, Chaldée, Grec, Latin et Syrien, lesquelles nous avons,par la grâce de Dieu, auctorité de nostre Roy et faveur de miens Signeurs et amis, tellement poursuivies que nous espérons les achever dedans deux mois; et d'autant que, suivant l'intention et volonté de Sadicte Majesté, dont je suis adverty, il nous les conviendra incontineni:

mectre en lumière, j'ay adverty Monsg"" le Docteur B. Arias Montanus qu'il ne me sembleroit pas convenable ne seur pour moy de ce faire, sans en avoir premièrement aussi obtenu le congé et Privilège du conseil de Sa Majesté es pays de par deçà, chose qui luy a semblé bonne et, à caste occasion, m'a il faict faire ceste requeste, soussignée de sa main, à laquelle je supplie V. S. donner telle favorable apostile qu'elle trouvera convenir pour l'auctorité de Sa Majesté, la dignité de l'œuvre et la faveur d'infinis travaux, despenses et fraiz y consumés et ce au plus tost et en la milleure forme que faire se pourra, à cause que de brief il nous convient imprimer les feilles ausquelles doibvent estre comprins les Privilèges. Et je prieray Dieu qu'il luy plaise nous conserver et garder V. S. en toute bonne santé et heureuse prospérité.

D'Anvers, ce 9 de janvier 1572.