MARGUERITE A MAXIMILIEN

Marguerite renvoie vers son père le président de Bourgogne pour être soldé des frais du voyage qu'il a fait par ordre de l'Empereur. — [Minute '.)

( Septembre. )

Mon très redoubté seigneur et père , je me recommande très humblement à vostre bonne grâce.

Monseigneur, j'ay receu les lettres que m'avés escriptez en faveur du président de Bourgongne : pour le taux et poyemant de son voyagie et des extraordinaires en icelluy faiz , et ay faictz le tout communiqué au bureau de voz finances de par deçà, auquelz et aussi à moy a semblé que ledit président devoit estre ranvoyé devers vous, tant pour le taux que le poyemant de ce que luy peult estre dehu de reste desdits voiage et extraordinaires, actendu que vous avez prins en vostre charge le poyemant et entretenement dudit président pour sondit voyage, comme appert par les instructions et mémoires par vous baillées au seigneurs qui furent devers vous en Ferrete , desquelles envoyé cy encloz l'article concernant ceste matière. Et néantmoyns,

* Cette minute est écrite de la main même de Mercurin de Gattinare, le président du parlement de Bourgogne.

ET DE MARGUERITE SA FILLE. —1511. 420 Monseigneur, ceulx desdites finances, soubz vostre bon plaisir, ont visitez les parties dudit président et les journées de sondit voyage et faict et dresser ung taux que leur semble raisonnable, par lequel, oultre les mil et six centz escus que ledit président a receu sur les deniers d'Espaigne, treuvent estre ancore deu la somme de deux mil deux centz xx livres , dix solz tournois. Combien que ledit président ne se soit contenté dudit taux affermant avoir beacoup plus despendu oudit voiage , toutesfois ledit taux est ainsy demouré. Mais quant au payemant , Monseigneur, ensuyvant l'article de vosdites instructions et aussi que bien cognoissiés les grans charges que sont à présent par deçà , à cause de ceste guerre de Gheldres, n'a esté ledit président aulcunement apoincté de sondit payement.

Purquoy, Monseigneur, si est vostre bon plaisir, le pourrés fère assigner sur les deniers d'Espagne de ce que luy peult estre dehu. Ce que vous supplie très humblement de ma part voloir faire, afin que ledit président , en récompense de la poyne qu'il ha prinse, ne perde le sien. Et ce pendant envoyé ledit président en Bourgongne pour résider en son office et radresser ung peu les affères de par delà vous assurant , Monseigneur, que celle part les pays ont bien mestier de sa présence.

Mon très redoubté seigneur et père.