A M. DE MONPEROUX

Dijon, l() octobre lo63.

Monsieur mon cousin, le trésorier en la charge de la généralité de Bourgongne m'a faict entendre que le maistre des portz luy a escript pour estre deschargé de sa charge, attendu quelque empeschement qui luy a esté mys par vous ou voz soldatz; mesmes ont ostez les marchandises qui se conduysent sur la rivière, chose qui est au grand interest du Roy, encoires que je vous aye par cy devant escript de laisser passer toutes marchandises ; que je ne sçay si avés receu mes lectres. A ceste cause vous adviserés de n'en arrester une seulle et donner ordre que les officiers du Roy puissent faire leur charge et proffict de Sa Majesté, ainsi qu'ilz ont accoustumé du passé. Et pour ce que par cy devant les bledz ne sont sortiz de ce pays sans exprès mandementz de nous, vous adviserés d'y tenir la main, qui n'en passe sans en faire apparoir, en prenant garde que quelques-ungs de voz soldatz ne abusent des dictes graynes; car jay entendu qu'il en a passé grande quantité sans mandement de moy. Estimant qu'y donnerés ordre, ne vous en diray davantage, sinon que surtout il ne fault donner empeschement aux susdictes marchandises, charge du trésorier et de ses commis. Espérant que le ferez ainsi, ne la vous fcray plus longue. Qui est l'endroict, etc.

De Dijon, ce xvp octobre 1563.

Bibl. Nat. — Fonds français. — Ms. 4634, f. 101. — Minuta.