Les Livres de Cardan, p. 455, y

« Le second genre de veillance est, dit-il, auquel la seule opération est blessée et le vertu de l’esprit demeure : et croy cecy estre de telle sorte que j’ay souvenance m’estre advenu par trois ans continuellement. Cecy m’advint depuis quatre jusqu’à sept ans et toujours depuis la seconde heure du jour jusqu’à la quatrième, où, si plus tard je me levois ou je m'esveillois, je pensois voir quelques figures depuis le bas du lit, faites comme de petits anneaux de cuivre, lesquelles estoient des arbres, bestes brutes, hommes, des villes, des gendarmeries en bataille, d’instruments de guerre et de bataille, et d’autres choses telles qui descendoient et montoient les unes après les autres. Et entendu que je me délectois grandement de ces visions comme estant petit enfant et que je les regardois attentivement, Claire, ma mère, et Marguerite, ma sœur, m’interrogoient diligemment, si je ne voyois pas quelque chose. Quant à moy, néanmoins que je fusse petit enfant, je sçavois bien que c’estoit quelque ostentation prodigieuse : pour ce, j’asseurois ne voir aucune chose, craignant que si je le révélois, ceste vision ne me laissast ou qu’il ne m’advînt quelque mal pour avoir révélé tel secret. »