A laRoyne

Madrid, 14 février 1574.

Madame, Il n'y avoit pas deux heures que j'avois baillé une mienne petite depesche du trentiesme de janvier au conte d'Ollivares pour Voz Majestez, quand le s' de l'Aubespine est arrivé avec celle qu'il vous a pieu me faire du septiesme dud. mois. Qui m'a faict retenir ce porteur jusques à présent, n'ayant vouUu faillir d'aller plustost à l'audience du Roy Catholique pour veoir s'il me respondroit promptement aux poinctz que je luy ay représentez de la part du Roy; ce qu'il n'a faict, ains m'a demandé les luy bailler par escript pour y penser. A quoy j'ay satisfaict et respondu qu'il y ait ne feray faulte d'en envoyer la responce à Sa Majesté. Et puis, Madame, qu'il vous plaist laisser dormir le propoz du mariage de Portugal, je me garderay fort bien d'en parler sinon en la sorte qu'il m'est commandé par l'instruction. J'estimois don Loys de Torres homme de bien devant que l'abbaye luy fut donnée et luy avoir promis le chappeau, car il me tennoit ung langage de bon serviteur du Pape. Toutesfois après qu'on luy a heu donné led. os à ronger comme à ung matin affamé, il s'est tout changé. Aussi vault il mieulx, Madame, qu'il ait declairé à son retour à Rome ce qu'on l'avoit icy instruict de dire, que s'il eust davantage trompé sond. maistre et que Sa Saincteté vous eust abuzez. Si est ce. Madame, qu'on m'escript du premier et second de ce mois de Lisbone que tout Portugal du grand au petit sont très dezireux et affectionnez que Madame votre fille soit leur royne. Il ne s'y parloit poinct

encore de depescher personnage vers Vos Majestez; mais estoient en grand soucy et travail d'appaiser la royne et la destourner de se venir retirer en Castille, comme elle en a faict le bruict et les démonstrations. Et à ces fins, le roy son petit filz, estoit venu vers elle, il y avoit huict jours, pour l'en dissuader. On parloit d'assembler les estatz pour délibérer sur led. mariage et des moyens pour contenter lad. Dame royne. Le confesseur Theatin estoit allé à Coymbre; on avoit opinion qu'il n'en retourneroit de longtemps.

Madame, je ne puis laisser ny faillir en cest endroict, puisqu'il ne se parle plus dud. mariage, de- vous supplier très humblement qu'il vous plaize me révoquer de ceste ambassade; car en m'en retirant vous donnerez encore plus à penser que vous ne prétendez plus aud. Portugal; et quand bien il seroit ainsi qu'il fust neccessaire de me retrouver en ce lieu quand il s'en traicteroit, je ne ferois le vieil ny le pezant d'y retourner, ains me seroit trop d'honneur et de faveur de vous y faire service; et pareillement si le propoz dont Mons' de MaUcorne m'a parlé pour Monseigneur vous est à cueur pour le debvoir mectre en avant, Votre Majesté m'en pourra lors commander son bon plaisir; ce qui est très neccessaire que j'entende et en soye instruict de votre bouche, car c'est ung négoce si hault qu'il me le fault bien imprimer en la teste pour vous y servir à votre contentement, comme je mectray fidellement tout mon debvoir de m'en aquicter pour le service de Voz Majestez et de mond. S' d'Anjou. Bien sera bon que je vous die plustost que de le propozer le peu de foy que j'ay aux promesses ny belles parolles des gens de deçà; car ilz promectent le plus souvent ce qu'ilz n'ont aucune intention d'acomplir, ainsi que j'ay rcmonstré aud. s' de Malicorne; et ne vouldrois, Madame, que Votre Majesté ne son Alteze eussiés prins mon opinion en mauvaise part; ce que je luy en representois par manière de discours, comme aussi il m'en parloit de mesme, sans monstrer pouvoir ne instruction; et vous scavez, Madame, ce qu'il apartient de faire en ung faict de telle conséquence, et pour moindres Votre Majesté m'a bien faict l'honneur de m'escrire de votre main ou par instruction.

Madame, si le Roy et vous n'avez encore faict élection du personnage qui me doibt venir lever le siège, j'oze bien m'in-

gérer à vous dire qu'il me semble si Mons' de Rieux y vouUoit venir, qu'il est homme pour s'aquicter de ceste ambassade comme ung autre de notre robbe. Il sera tantost en votre court, car les Estatz de Languedoc l'ont délégué vers Voz Majestez; et croy qu'il n'obliera de vous remonstrer la malignité d'un habitant de Narbonne nommé Paul Dacliery, duquel j'ay autresfois donné information à Votre Majesté du mutin et faiseur de menées qu'il est. Il n'est de rien amendé pour avoir trempé es prisons de Tholose; et le meilleur seroit luy défendre l'entrée de lad. ville de Narbonne, car ung tel boutefeu pourroit estre cause d'assez de mal en ung lieu de telle importance, où il n'y a citadelle ny chasteau; ains perdant Tune des portes, lad. ville seroit perdue.

Madame, je dezire extrêmement de retourner aud. Narbonne faire ma charge ' . Et suis certain que les citoyens en auront bon plaisir, jaçoit que led. s' de Rieux les a bien traictez en mon absence; lequel a mérité d'estre gratiffié d'un autre gouvernement aultant ou plus honnorable que led. mien de Narbonne. A quoy j'espère qu'il plaira au Roy et à Votre Majesté avoir esgard et je les en supplie très humblement. Au reste, Madame, ce porteur dira à Votre Majesté comment il a esté à Cordoua pour faire faire les tappis godamacilz suivant votre commandement.

Dud. jour xiiij"' février 1571.

272. —Certains poinctz représentez à Sa Majesté Catho* lique par le s' de Fourquevaulx, ambassadeur de Sa Majesté Très Chrestienne.

Le plus grand dezirde Sa Majesté Très Chrestienne, c'est sur toutes chozes de conserver et entretenir inviolablement la paix et araytié qu'il a avecques Sa Majesté Catholique; et faisant jugement par son intention de celle dud. seigneur Roy Catholique, son bon iïére, il veult bien croire que leurs dezirs en cella sont conformes.

Car il y a plusieurs raisons qui les doibvent induire et esmouvoir à conserver entre euli réciproquement lad. paix et amylié. En premier lieu le bien universel de la chrestienté ; car il n'y a rien qui tant augmente le cueur et la hardiesse de l'ennemy commun d'icelle que la foible amytié qui est entre les princes chrestiens ; en oultre la considération de l'alliance nouvelle

* Ancienne de gouverneur.

de Leurs Majestez, puis le bien et repoz parlicullier de leurs royaumes et la conservation de leur authorilé en iceulx.

Ce que Sa Majesté Très Chrestienne mande au s' de Fourquevaulx, son ambassadeur, le représenter et renionstrer à Sa Majesté Catholique toutes les fois que l'occasion s'en présentera., la priant de sa part y voulloir correspondre de son cousté et d'en faire par ses ministres toute démonstration par bons elTectz.

Depuis ung an, led. S' Roy Très Chrestien a envoyé par plusieurs fois exprez vers le duc d'Alve pour le prier ne voulloir impozer et lever sur les subjectz du conte de Saint Pol le denier de centiesme, comme il faisoit par toutz les Pals Bas qui sont soubs Tobeissance dud. S*^ Roy Catholique. Mais Sa Majesté Très Chrestienne n'a jamais sceu avoir response dud. duc conforme à ce qui est porté par le traicté de paix faict au Chasteau Cambrezis et à la raison et équité.

Longtemps après les premières instances qui luy en furent faictes, led. duc feist une response par escript que le s' don Francés d'Alava présenta; à laquelle fust respondu, tellement qu'il appert que lad. imposition et levée de deniers ne peult eslre faictc en lad. conté de Saint Pol sans faire tort à Sa Majesté Très Chrestienne et contrevenir aud. traicté.

Et combien qu'il y ait trois mois ou plus que lad. response dernière a esté envoyée aud. duc d'Alve et que Sad. Majesté l'ait faict solliciter par son agent qu'il tient prez de luy d'y respondre, loutesfois il remect tousjours la choze en longueur et cependant ne laisse de passer oultre à lad. levée et imposition.

Dont led. S' Roi a voullu que led. s' de Fourquevaulx face plaingte aud. S' Roy Catholique en le priant très instament, au nom de Sa Majesté Très Chrestienne, d'y faire pourvoir comme la raison, justice, équité et l'observation desd. traictez requièrent; et pour ce faire, voulloir escrire très expressément aud. duc d'Alve h ce que, s'il ne se veult départir de lad. imposition et levée desd. deniers pour ne prejudicier au droict qu'il pense que Sa Majesté Catholique y a, à tout le moins qu'il surçoye l'employ d'iceulx jusques à. ce que la choze soit décidée.

Les subjectz de lad. Majesté Très Chrestienne qui sont de la nouvelle religion ont faict plaingtcs et doléances très grandes des mauvais traictementz qui leur sont faictz en Espaigne et es terres qui sont soubz l'obéissance de Sa Majesté Catholique quand ils y arrivent et abordent pour leurs traffiques; que l'on leur confisque leurs marchandizes, leur retient on leurs vaisseaulx et les faict on prisonniers, encore qu'ilz ne se meslent d'autre choze que de leur trafficq et qu'ilz ne facent aucune faulte à ce qu'ilz doibvent et de quoy ilz ne peuvent avoir aucune justice ne raison ; suppliant aud. S' Roy leur y faire remédier à ce qu'ilz puissent joyr du beneffice de la paix et amytié qui est entre leursd. Majestez, et, comme ses bons et fidelles subjectz qu'ilz sont, trafficquer en terres dud. seigneur Roy Catholique sans eslre si misérablement et cruellement traictez, à la charge de ne faire aucune choze qui contrevienne aux loix des païs où ilz descendront et d'estre puniz s'ilz feront autrement, choze que Sa Majesté Très Chrestienne trouve très juste et raisonnable.

A ceste cause, il mande à sond. ambassadeur d*en faire remonstrance à Sa Majesté Catholique, afin qu'il luy plaize commander que lesd. François soient iraictez et receuz en ses pajs plus gratieusement et comme ses autres subjectz, à la charge de ne contrevenir aux loix et statutz du pals; et a esté ordonné restituer à certainz raarchantz espaignolz les marchandizes prinses dedans ung navire par aucuns de lad. nouvelle religion estants à La Rochelle avant que la paix fut publiée en lad. ville de La Rochelle.

Combien que Sad. Majesté Catholique soit esté supplié par led. ambassadeur beaucoup de fois et de long temps, au nom dud. seigneur Roy son maistre pour la délivrance d*un nombre de François detenuz es prisons de Seville, de laquelle très humble requeste Sad. Majesté ne luy a dict de non ny faict reffuz, ains donné bonne espérance de la voulloîr faire, neantmoins les s" du conseil des Indes veullent faire mourir lesd. captifz en prison, comme aucuns autres leurs compaignons y sont mortz, qui pour y avoir esté meurtriz et qui de fain, pouvrelé et malladie, y estant traictez pirement que les chiens; et aucuns des autres sont esté envoyez en gallères, jaçoit que du nombre desd. mortz et vivantz les aucuns soient esté faictz prisonniers aux Indes et sur mer durant la guerre, et par conséquent ilz deussent joyr du traicté de paix et les derniers prins ne soient esté trouvez coulpables par le conseil rezident ausd. Indes, ains banniz d'icelles, les remectantz à la mercy de Sa Majesté Catholique, sans envoyer avecques eulx charges ne informations; car estoient innocents, comme aucuns Anglois aussi prisonniers aud. Seville ont confessé et deppozé. Ce nonobstant, lesd. s" du conseil des Indes ont ordonné que lesd. informations seroient mandées venir desd. Indes; qui est une dillation et longueur apportée pour cependant faire morir de fain et de misère lesd. hommes.

A quoi la bonté de Sa Majesté Catholique aura, s*il luy plaist, esgard, et non à la sévérité et rigueur desd. juges.

Et sera servie de faire telle et si digne response sur toutz lesd. articles, comme à la fraternelle amytié qui est entre Leurs Majestez apartient.

Sa Majesté Très Chrestienne par ses lettres du xxvj de janvier faict requeste et prière à Sa Majesté Catholique qu'il luy plaise permectre et donner licence au s' de Fosseuze de vendre et allienner la terre et seigneurie dud. Fosseuze qu'il a es pais d'Arthois soubz son obéissance, à quelcun de ses subjects et Sad. Majesté Très Chrestienne recevra lad. grâce faicte aud. gentilhomme pour ung grand plaisir faict à luy, dont il se revenchera en requeste pareille, quand à Sa Majesté Catholique plaira.