A la Royne
Madrid, 4 août 1571.
Madame, La meilleure nouvelle que je pence vous pouvoir donner de ce cousté est de la santé de Mesdames les Infantes voz petites filles. A ceste cause, je vous asseure que, Dieu grâces, elles se portent fort bien, jaçoit que les chaleurs leur sont ung peu contraires et qu'elles n'ont liberté d'aller dehors s'esbatre, comme leur naturel vouldroit. Et la mesme Royne Catholique ne sort gueres jamais de son quartier de logis; de façon que sa court semble d'ung monastère de nonnains; et bien heureuze la Royne Chrestienne sa soeur d'avoir plus de contentement et esbatement en ung jour que ceste Catholique n'a en ung mois. Madame la Princesse de Portugal est comme le s' Jeronimo Gondy l'a laissée; mais ses pâlies couleurs la rendent plus belle que sa meilleure santé.
Madame, le Nonce du Pape me dizoit ces jours passez que le Roy Catholique luy a asseuré dernièrement qu'il estoit icy, qu'il dezire infiniment que Madame votre fille soit royne de Portugal; à quoy il s'est employé à faire toutz bons offices envers le Père Sainct, afin que Sa Saincleté le face trouver bon au roy, son nepveu, qui faict encore difficulté de se maryer si jeune^ à cause des deuxTheatins qui l'en dissuadent de peur qu'il meure enfant comme feit le prince dud. Portugal, son père. Si est ce que la royne son ayeuUe le presse que led. mariage se face, protestant s'il ne se fera, qu'elle sortira dud. Portugal pour Se retirer en Castille, parmy autres occasions que led. roy son petit filz luy en donne, mesme pour le peu de crédit et autorithé que elle a auprez de luy. Et scait icelluy s' Nonce que le cardinal Alexandrin qui vient légat par deçà a charge expresse de Sad. Saincteté de presser par toutz les moyens qu'il pourra que led. mariage se conclue. J'atendz tousjours que Almeydo m'en donne quelque bonne nou-
velle; et il attend que don Hernand Martines soit redepesché de Sa Majesté Catholique, se tennant icelluy Almcyde asseuré qu'il sera respondu aud. Martines quelle espérance et opinion ced. S' Roy a dud. mariage pour la declairer à lad. Dame Royne. Et icelluy Almeyde se proraect de le scavoir aussitost pour en advertir Votre Majesté. Il dict davantage que encores que lad. royne se retire en Castille, qui est ce que le cardinal de Portugal vouldroit, il ne fault poinct pencer que pour cella led. mariage se laisse de faire; car led. cardinal le procurera lors de tout son pouvoir, afm d'en avoir le bon gré et qu'il puisse gouverner encore quelques ans soubz la jeunesse des roy et royne, comme la royne ayeuUe prétend de régner s'ilz se maryent par son moyen.
Led. Martines, Madame, faict estât d'avoir sa depesche au retour de lad. Majesté Catholique, tantost après la feste S' Laurens ou au plus tard passée la Notre Dame; mais led. légat n'arrivera de longtempz. Et suis adverty que ced. S' Roy depeschera bientost vers l'Empereur luy demander sa troisiesme fille pour led. roy de Portugal. Je ne scay si c'est du sceu dud. don Hernand Martines. Et quoy qu'on die, je me double qu'on seroitbien marry par deçà que le roy de Portugal fust votre beau filz, ny que les affaires de France allassent en prospérant ; car j'ay cogneu en eulx trop grand froideur à traicter ce mariage. Et n'ay pas oblyé les mauvais offices qu'ilz envoyèrent faire aud. Portugal pardon Francés Pereires desja duLxvj* . Toutesfois j'ai espérance qu'il se fera maulgré toutz empeschementz si Voz Majestez l'auront agréable; car tout Portugal le dezirepour plusieurs respectz et d'avoir lignée dud. roy, devant que luy permectre d'en sortir ny entreprendre sur le roy de Fez ; ce qu'il brusle d'envye de faire en personne, faisant adrecer son peuple aux armes et principallement sur lad. intention.
Pour fin. Madame, les habitans d'une ville d'Aragon nommée Teruel ont vouUu pourvoir aux offices de la justice et poUice de leur ville en absence de leur gouverneur estably par le Roy Catholique, auquel cela aparticnt. Et de faict y ayant pourveu lesd. habitans, icelluy gouverneur a tout renvercé. A occasion de quoy
'Déjà en 1566.
y estant survenu du desordre entre luy et eulx, c'est le duc de Segorbe qui est accoru au secours dud. gouverneur et autres gentilzhommes du royaume de Valence avec cinq mil hommes qui ont appaisé la mutination. Et à présent se faict le procès aux principaulx desd. habitans. On a opinion que Saragosse et autres bonnes villes dud. Aragon s'entendoient avec led. Teruel et envoyent par deçà s'escuzer. Il prend fort bien à Sa Majesté Catholique d'estre en paix avec le Roy; car s'ilz estoient ennemys, TEspaigne seroit tantost en révolte pour plusieurs causes qu'on leur en donne.
De Madrid, le quatriesme d'aoust 1571.
