A la Royne

Madrid, 22 janvier 1572.

Madame, Je me conjouiz le dix du présent de votre part et de la Royne votre fille avecques le Roy Catholique pour la grâce que Dieu luy a faicte de luy donner ung filz, suivant ce qu'il a pieu à Voz Majestez en escrire et commander du xxvj du passé. Duquel office led. S' Roy fust très aize, et a belle envye de vous pouvoir rendre la pareille par la naissance d'un daulphin. Je fuz le mesme jour baizer les mains à Mesdames les Infantes, leur donner voz recommandations; qui me commandèrent d'en rendre ung million à Votre Majesté; et n'y eust opportunité de viziter la Royne Catholique pour led. jour. A quoy j'aurois satisfaict depuis, si unecoUiquo suyvie d'aultres doleurs ne m'eust assailly lendemain et contrainct de garder lict ou chambre jusques à présent. J'espère toutesfois sortir demain. En ces entrefaictes, Madame, est arrivé Lasalle avec une lettre du Roy et non de Votre Majesté. J'avois desja pourveu et satisfaict à ce qu'il a pieu à Sa Majesté me commander par sad. lettre touchant le cardinal Alexandrin; et vois comptant par mes doigtz que mon successeur ne peult tarder à venir plus de deux ou trois jours, si ce qui m'est mandé par lad. lettre aura effect. Vous advisant, Madame, que le secrétaire Cayes me veint veoir encore hier et me dizoit que la lettre que Votre Majesté escrivist au Roy son maistre de votre main parlant de don Francés, l'a mis en fort grande perplexité, car dezire merveilleuzement de vous complaire. Toutesfois, Madame, je ne vois point qu'il en face démonstration contre led. d'Alava. Il est vray que toutz le blasment de s'en estre venu si ignominieusement et à la desrobée, comme il a faict; car cella suffizoit pour escandailizertous les deux Royaumes, si leurs Majestez Très Chrestienne et Catholique ne feussent si bons frères et amys comme ilz sont. Led. Cayes m'a prié de scavoir si Aguilon vous est agréable en sa negotiation ; car, s'il ne l'est, il aura tantost après une

420 DÉPÊCHES DE M. DE FOURQCEVÂtX

reprimende, afin qu'il face mieulx. C'est en atendant don Diego de Suniga.

De Madrid, le xxij"*de janvier 1572.