Au Roy

Madrid, 16 février 1570.

Sire, A la depesche du s' Gondy restoit pour vous l'envoyer complette que la capitullation signée de l'ambassadeur de l'Em-

pereur et du votre y fust ; laquelle m'a esté envoyée par le secrétaire Cayes le douze du présent tant mal escripte en françois. qu'il appert bien que ung flameng espaignolisé y a mis la main. Elle va en latin aussi, et toutes deux d'une substance; je les envoyé à Votre Majesté par ce courrier que je renvoyé exprez. Celluy de l'Empereur partist le treiziesme de ced. mois, devant jour; lequel s'en va apporter à son maistre les capitullations des mariages de Mesdames, ses deux filles, avecques vous, Sire, et avec le Roy d'Espaigne; lequel S' Roy envoyé par led. courrier nommé Gilles à Madame la Princesse Anne ung diamant de trente mil escuz à porter au coul et quelques autres bagues ; et luy est commandé d'aller par mer jusques à Gennes ou Marseille de crainte des huguenotz de Languedoc. Il seroit bon, Sire, que notre Royne qui sera, peult partir de chez led. S"" Empereur à mesme jour que celle d'Espaigne, mais il y aura difficulté; car ilz ont leur afl'aire prest et y ont pourveu à leur commodité, comme seigneurs des personnes, et du tempz. Vray est que Votre Majesté aura moins de chemin à luy faire faire, faisant mon compte que de Prague jusques aux premières limittes de votre Royaume, n'y scauroit avoir six vingtz lieues communes, hed. s' don Dietristain est d'opinion ^que Madame la Princesse Yzabeau fera son chemin partant de Prague à Pilsne et Ratisbonne sans arrester ny toucher sur les terres du Palatin ; car Sa Majesté Cezarée est mal aveques luy; puis elle passera par le païs du duc de Bavière et après le cardinal d'Auguste la recevra, et les bonnes villes imperialles, Auguste, Ulme et le duc de Vistemberg, et Strasbourg la vouldront honnorer et festoier; et ainsi sortira d'Allemaigne pour entrer par Lorrhaine en votre Royaume. Il est vray que led. ambassadeur a opinion que les s" d'Austrie vouldront que les deux Altezes partent de Vienne comme ont faict les autres princesses filles de lad. maison; et ceulx de Bohême vouldront semblablement cest honneur, sinon qu'ilz facent que les ungs accomppaignent l'une, et les autres l'autre ; mais comme Vienne est plus prez d'Itallie, aussi Prague l'est de France, de six bonnes journées. Led. courrier, Sire, pense bien qu'il trouvera lad. Dame Anne preste de s'acheminer, ou bien qu'elle sera desja acheminée; car il n'y sera de vingt cinq jours pour bien qu'il picque; et fait on estât par deçà qu'elle seradens Gennes par

tout le mois de mars, et en ce royaume dans la fin d'avril. L'arcevesque de Seville et le duc de Bejar cheminent vers Saragouce, et vont s'embarquer à Barcelonne ; ilz ont souvent des courriers du Roy Catholique pour les solliciter d'aller. Led. s' André Dorie a charge des gallères qui passeront et amèneront lad. Princesse Anne ; lequel a commandement de la mectre en terre au premier bon lieu de ced. Royaume, où il abordera encores que ce deust estre à Rozes, pour evicter aux dangers de la mer. Les fourriers de Sa Majesté Catholique qui doibvent aller faire les logis à Vallence et aud. Barcelonne sont desja nommez; lesquelz partiront de Cordoue dès lendemain que led. S' Roy y sera entré. Ce que je viens de dire à Votre Majesté est la plus grande clarté que j'aye peu avoir que la descente de lad. nouvelle Royne sera à Barcelonne, ou au plus loing à Valence, qui est quarante neuf lieues au deçà. Le séjour que ced. S' Roy entend faire aud. Cordoue sera brief ; il y doibt entrer le onze ou vingt uniesme de ce mois. Je suis bien marry, Sire, que je n'y puisse estre de ces heures, afin de satisfaire ce qu'il vous a pieu me commander par votre depesche du xviij de janvier que ce courrier m'a donnée le neufiesme du présent. Mais ma lampe est sans huille, car je n'ay point encore receu les deux mil escuz, ny scay à quel jour je les pourray toucher; duquel don. Sire, je remercie Votre Majesté très humblement.

De Madrid, le xvj"* février 1570.