Au Roy

Madrid, 11 octobre 1570.

Sire, Les nouvelles que j'ay aprinses depuis que Vallue est parly, iront par cesle lettre après vous avoir dict que don Loys de Tourres m'a monstre qu'on luy a escript de Rome que le Pape tennoit souvent concistoire pour remédier à la peur qu'il avoit de perdre Avignon à cause de la paix de France, trouvant bien estrange que Votre Majesté print en mauvaise part qu'il y eust envoyé des soldatz Italiens en garnison; el avoit coru ung bruict aud. Rome comme il a faict icy, que vous, Sire, vouliés bailler lad. ville et le contât de Venice à ceulx de la religion prétendue reformée ; dont Sa Saincieté estoit fort esbahye , et aussi de ce que lesd. Avignon et contât ne sont esté comprins et rezervez de votre part aux articles de la paix.

Ces langages, Sire, ont donné icy de nouveau à parler à ceulx qui ne peuvent gouster le repos de votre Royaume ny la rcconcilation de vos subjectz. Mais j'ay respondu aud. de Tourres qu'il n'y avoit propoz ny apparence de comprendre lesd. villes et contât dans la paix, car TEstat de l'Eglise est de tout temps soubz la protection de la couronne de France, et que Tedit de la paix a esté faict afin de paciffier et reconcilier les Fran-

çois qui estoient en querelle entre eulx et non en guerre contre Votre Majesté ; de sorte que voullant comprendre et rezerver les amys et alliez de votre couronne en lad. paix, il estoit requis qu'il y eust heu à Tencontre de Votre Majesté ung autre roy votre esgal, lequel eust en semblable comprins les siens suivant la costume et nature de telz traictcz; ce que n*a lieu par lad. paciffic^ation ; car c'est Votre Majesté qui reconcilie sesd, subjectz réciproquement, et leur a pardonné à tous; car il y est intervenu de la faulte de toutes partz ; et n'y a point apparence de penser que lesd. Italliens fussent suffisantz de défendre lad. ville, quand il vous plairoit de vous en emparer ou la consigner à quelcun, mais bien lad. garnison donneroit coleur et occasion ausd. prétendus reformez de crier qu'on entretient des estrangers contre eulx, et de vouUoir eulx pareillement qu'il leur soit permis d'en tenir pour leur seureté ; qui seroit aud. cas reallumer le feu qui tant a cousté d'estaindre. Auquel compte le soubspeçon que Sa Saincteté a heu de chose tant esloignée de raison, doibt estre sorty des ennemys et envyeulx de votred. courone, qui vouldroient mectre en jallouzie et deffiance led. Père Sainct de votre cousté; ce qu'il n'a occasion, ains de croire et faire estât que Votre Majesté quand besoing sera se déclarer prendra à Texemple des Roys vozencestres la deffence du Sainct Siège contre et envers quiconque essayera de l'offencer; qui est fort loing de debvoir craindre que voz subjectz de quelque religion qu'ilz soient entreprennent de votre consentement d'envahir ou endommager led. Avignon ou contât. Ainsi il m'a esté advis, Sire, (jue led. de Tourres est demeure satisfaict des doublas susd. Et luy ay remonstré quant aux articles dud. edict, (ju'ilz ne sont si desadvantageux comme l'on crie, mesme que par l'eedict premier on preschoit à la calviniste quasi en toutes les citez de France; ce qui est défendu par le dernier. Icelluy de Tourres pence reprendre demain son chemin dud. Rome par la poste; et veu qu'il est mieulx informé que tout autre de ce qu'il a passé en Portugal, je croy que Sa Saincteté vouldra qu'il aille vers VozMajestez vous rendre compte de sa négociation; il est Espaignol, mais en ce négoce je l'estime plus serviteur de Sa Saincteté que de nul autre prince.

Sire, l'infanterie qui se faict en gros nombre en ce royaume

servira pour la ligue; et j'entendz que deux mil hommes passeront en Piémont pource que Monseigneur de Savoye a deffiance de ceulx de la religion nouvelle et de Mons' l'Admirai, qui, comme Ton dict, espouze la contesse d'Entremont; et a esté bruict qu'il alloit estre votre lieutenant gênerai aud. Piémont, non sans donner à discourir aux courtisans trop credulles. Autres compagnies vont en Granade à la garde de douze forts que le commandeur mayor de Sainct Jacques a faict faire dens les montaignes de l'Alpuxarre, qui seront tantost achevés, et en autres places dud. royaume; car n'y voyent autre remède pour assubiectir les Morisques; encore par dessus cela ont envoyé d'icy desplacer et tirer dud. pais plus de cinquante mil âmes de ce peuple pour les translater en Castille; et en leurs lieux entreront chrestiens Castillans. Le petit roy ne faict plus teste, ny sa suite; mais vont eschappant de roche en roche sans faire résistance ; et neantmoins si les Chrestiens se desbandent, iceulx Morisques ne leur sont pas si esloignez qu'ils ne les trouvent à leur dommage, quelques espoisses garnisons qu'il y ayt. Aussi la rezollution, Sire, de Sa Majesté Catholique sur l'élection du capitaine gênerai des forces qui descendront en terre pour la ligue fust avant hier envoyée à Sa Saincteté et à Venise bien couvert et secrètement. Si est ce que le duc de Parme aura lad. charge ou le duc d'Urbin. Ung banquier gcnnevois m'a dict que les Vénitiens sont en quelque voye d'accord avec le Turc, ainsi qu'ilz ont heu advis à Gennes; à quoy Sa Majesté Catholique mectra tout l'empeschement qu'il pourra; car lad. ligue faict pour luy en plusieurs manières et merveilleusement luy prentbien au temps qui court. Et a coru de quoy Voz Majestez sont bons amys et m'a parlé encore en mad. audience qu'il sera contraint d'armer contre les courssaires de votre Royaume, s'ilz molesteront plus ses subjectz.

De Madrid, le xj""' d'octobre 1370.