Au Roy

Madrid, 9 novembre 1570.

Sire, Lorsque la depesche qu'il a pieu à Votre Majesté me faire du xij"' du mois passé m'a esté donnée, le xxvj"*, parce porteur chevaucheur de votre escurye, le Roi Catholique estoit de quelques jours paravant en sa maison duPardo; et attendoit on qu'il deubt retourner en ce lieu d'heure à autre, pour s'acheminer d'icy à Segovie. Il est retourné le xxix"* sur la nuict; et le lendemain de bon matin s'est confessé à l'evesque de Cuengue, lequel n'estoit peu aller vers luy aud. Pardo, à cause qu'il est tousjours mallade; cela faict, il a veu monter à cheval, led. matin, les Princes de Bohême à plus de soixante chevaulx de poste pour se rendre au devant de la Royne Catholique, leur soeur, à Vaildolit où elle entreroit le deuxième du présent; et tout aussitost led. S' Roy a prins son chemin de TEscuryal, afin d'y faire la fesle de Toussainctz et y gaigner le jubillé donné par le Pape pour prier Dieu de donner victoire à l'armée de la ligue qui est allée combatre la turquesque en Chipre. J'esperois, Sire, de luy dire à ceste sienne venue ce qui est porté par volred. depesche et m'attendois qu'il feroit scavoir aux embassadeurs et à moy pour ung, comme il m'avoit promis en ma dernière audience, s'il trouveroit bon que nous allassions à ses nopces; mais led. S' Roy est aussitost esvanouy de Madrid qu'il n'y a nul ambassadeur qui ait heu loizir de le voir, et ne se trouvera aud. Segovye sinon don Dietristain et le Nonce du Pape ; si est ce que je me tennois prest d'y aller; de sorte qu'il fauldra que j'attende son retour pour satisfaire au contenu de votred. lettre, comme je feray en semblable pour viziter la Royne sa femme de votre part, Sire, en attendant le gentilhomme qui doibt venir exprez s'il ne sera venu devant que cela soit. Je n'ay toutçsfois vouUu

retenir led. courrier jusqucs alors, car ce mois sera prez de la fin devant que ces Majestés Catholiques soient icy ne qu'ils puissent donner audience, aîns m*a semblé devoir respondre à Votre Majesté ce que j'ay aprins de l'anglois venu d'Hirlande, et l'advertir de quelques autres particularités.

Sire, par la lettre susd. de Votre Majesté, il vous plaist entendre ce qui sera reussy de la venue du sieur Stuely gentilhomme anglois; ce que j'ay mis peine de descouvrir, et suis adverty qu'il a apporté lettres et promesses en bonne forme de toutz les princes d'Hirlande invoccantz l'ayde et faveur du Roy d'Espaigne encontre la royne d'Angleterre, se donnants à luy en foy et hommage de vrays subject et vassaulx et demande icellui Stuely six mil hommes de pied et mil chevaulx pour avecques les forces desd. s" Hirois chasser les gens de lad. Dame royne, ce qu'il estime très facille, et je suis de son opinion selon quelque cognoissance que jay de lad. ysle; le chef qui la fera n'est encores declairé ny cela; ains se tient fort secret; si est ce que le cap»* Julian Romero, gouverneur de Hedin, lequel est en ceste court, procure soubz main avec led. Anglois qu'il luy en face avoir la charge. Toutesfois je pense que ung plus grand que luy l'aura non de par Sa Majesté Catholique pour plusieurs respectz, ains comme capitaine adventurier ou soldoyé du Pape couvrant l'occasion de drecer lad. expédition et armée sur la révolte d'une ville de Frise appellée Grinninghen, sur laquelle on feindra la vouUoir employer. Quant à dire le temps du partement, Sire, ce sera sur la fin de l'hiver. Il y a des gens faictz en Gallice pour cela et qui se font en autres provinces d'Espaigne. L'arcevesque de Cassel et luy s'accordantz mal, s'en est allé à Segovye prendre congé de Sa Majesté pour se retirer aud. Hirlande, qu'on ne vouldra; mais il faut considérer sur ce propoz que la bulle du Pape tant aigre contre la royne d'Angleterre n'estoit pas sans mistere ny pour moins que du sceu de deçà, afin de dispozer Anglois et Hirois à une rébellion; car il est vraysemblable que dès l'heure que Tisle Hirlande sera envahie par armes estrangeres pour la religion et querelle du siège apostolique lequel tend en estre souverain par tiltres authentiques, et assistez dcsd. princes Hiroys, que le feu d'icelle isle saultera en Angleterre, de façon que lad. Dame royne ne fust de sa vie

en plus grand hazard. A quoy Votre Majesté scaura très bien prendre garde de bonne heure pour la conséquence, car ceste manière de favorizer séditieux et rebelles va bien loing et les Espaignolz scavent mieulx s'en prevalloir que gens de ce monde au tesmoignage de toutes leurs chroniques antiennes et moderneSj et ne seroit pas herezie d'alléguer que par leurs inventions et artifices, la France entra une bonne partie aux divisions et troubles qu'on Ta veue de votre règne. Dieu veuille par sa sainte grâce qu'ilz n'ayent plus la joye de les y veoir comme ilz espèrent et comme l'on leur escript que la paix n'est pour y durer guère de temps; laquelle espérance est le seul fondement de leurs dessains. D'une chose, Sire, me tiens je asseuré; c'est que sy Votre Majesté entreprennoit une guerre sur led. Angleterre, ou autre prince votre voisin, que Sa Majesté Catholique n'espargneroit rien pour vous en garder; aussi cest advis que je vous donne d'Hirlande n'est pas si certain qu'il faille vous esmouvoir ny vous declairer à l'encontre pour empescher l'entreprinze; mais ung adverty de bonne heure en vault deux.

Au regard, Sire, du duc de Medine Celly, il certainement ira en Flandres lever le siège au duc d'Alve, cela est tout resoUu; de laquelle élection, beaucoup de personnes s'esbahissent , mesmes ceulx qui ont opinion que telle charge excède la suffizance dud. duc de Medine, qui pourroit bien aussi procéder d'envye. Son partement sera en janvier, accompaigné de deux mil bizognes pour remplir les bendes espaignoUes dud. Flandres et par la mer de ponent. Mais led. duc d'Alve attendra qu'il arrive pour luy remectre toutes choses et après s'en viendra par le chemin qu'il feit en allant, et s'embarquera à Gennes sur les gailëres qui auront passé lesd. Princes de Bohême; lesquels feront courte demeure en Espaigne dors en avant, car l'Empereur les veult; joingt qu'ils feront place à deux de leurs petitz frères qui sont avec la Royne Catholique leur soeur, ainsi que son ambassadeur don Dietristain me disoit l'autre jour.

Touchant aux affaires de Grannade, Sire, ils sont en Testât que j'ay escript dernièrement à Votre Majesté ; et connoissant à présent ces sieurs qu'ils n'ont pas bien procédé en leur guerre contre les Morisques d'avoir tenu ordinairement forces en campaigne, car suffizoit des garnisons des places pour l'ordinaire, et

qu'ilz eussent mieulx faict d'assembler les forces des villes d'Andelouzie et de CastiUe deux fois chacun an et entrer dens le païs desd. Mores donner le gast aux bledz et leur coupper vignes et arbres fructiers pour les réduire à la fain, suivant Texemplé des roys de CastiUe qui en usoient jadis ainsi; et à la longue lesd. Mores venoient à leurs piedz la corde au col; car lesd. villes sont obligées de fournir nombre certain de cavallerie et infanterie pour lad. guerre, toutes les fois qu'il plaira à leur Roy. On s'asseure que pour l'advenir led. royaume sera paisible, car Sa Majesté Catholique en faict sortir toutz les Morisques et les despartir parmy l'Espaigne. Il y a trois jours que par ceste ville passèrent quelques charges de raaniottes pour attacher les plus robustes ; il en y avoit plus de douze mil, au lieu et habitation desquels entrent Espaignols. Le grand commandeur de S* Jacques est commissaire de faire lad. transmigration.

Et que je die ung mot de Portugal à Votre Majesté. Tout homme est après pour s'equipper d'armes à pied ou à cheval chacun selon la valleur de son bien, qu'il n'y a grand ny petit en tout le royaume qui en soit exempt; et s'exercitent et adrecent tous les jours de feste comme s'ils voulloient bientost assaillir quelcun ou qu'ilz doubtassent d'estre assailliz. Cela ne se faict pas sans quelque dessain ny que ceste Majesté ne le scache; ils parlent d'aller sur le roy de Fez l'an prochain, et d'envoyer une armée de vingt cinq bons navires pour la ligue contre le Turc et autre flotte vers le cap de Bonne Espérance descendre ung bon nombre d'hommes pour aller bien avant en la terre de Moussambique, où leurs gens ont descouvert nouvelles mines d'or; mais les naturelz du païs sont gent belliqueuse et les deffendent. Il y a quatre jours. Sire, qu'un François est venu de Lisbonne qui a veu douze navires touz prestz à l'ancre et trois bien fort grands, qui s'apprestent. Toutz lesd. navires sont au roy de Portugal, faisant courirle bruict parmy la ville que c'est pour envoyer en France quérir leur royne avecques quatre mil hommes sur lad. flotte; lequel bruict de peuple me donne à pencer que ce pourroit estre pour led. Hirlande en compagnie des Espaignols, et vouldront y aller puissantz pour combatre l'armée des Anglois, si elle se présente. Je feray partir le mesme François demain avecques le paquet de lettres qu'il a pieu à Votre Majesté m'en-

N«« 263 ET 264. — 9 novembre 1570 297

voyer pour faire tenir à Madame Tlnfante ,de Portugal pour la capitanerie de Pêne d'Albigeois et escriray à certain personnage dud. Lisbone aussi François pour sçavoir ce qu'on luy faict, encore que Votre Majesté ait meilleurs moyens d'en scavoir nouvelles par les Brettons et Normantz qui trafiquent par mer aud. Lisbone; car ordinairement il y en a les trente ou cinquante navires, que à ma volunté leur fust il deffendu d'y conduire et porter bleds ny toilles, ains les traicter comme enemys, car leur jeune roy deviendroit plus traictable qu'il n'est. Duquel, Sire, don Loys de Torrcs vous ira dire des nouvelles après avoir rendu compte à Sa Saincteté de ce qu'il y a negotié. Ce pourra estre au commencement de décembre, et pour ce que je faiz un long discours à laRoyne, je mettray fin à ceste lettre. De Madrid, le neufiesme de novembre 1570.