LIVRE IV

à Sainct Anthoine, dans les déserts de la Thebaïde. Car il discourut si raisonnablement, parla si sainctement, et joua si bien le personnage de l'homme, que le Comte de la Mirande, Vadian, l'Autheur de la Généalogie des Dieux, et les autres qui reçoivent ceste opinion, ne se fondent point sur autre raison que sur cet exemple. Il me souvient queHalcyone, dans Ovide, se pourmenant sur le bord de la mer, toute soucieuse pour l'absence de son mary Ceyx, apperceut de loing floter je ne sçay quoy sur les eaux, qu'elle avisa tost après estre un corps d'homme sans discerner toutesfois qui estoit ce pauvre naufragé, et ne peut recognoistre que c'estoit le corps de son mary, jusques à ce que la mer l'eust jette près d'elle contre le rivage. Ainsi ceux qui n'ont regardé ce Satyre que de loing, n'ont peu descouvrir ce qu'il estoit, et tous ces Autheurs, s'arrestant au simple texte de ceste Histoire, et ne l'ayant pas considéré de prés, se sont

mespris en la cognoissance de ce Satyre. Mais comme ce Singe, qui se couvrit la teste et les espaules seulement d'une riche pièce d'escarlate, faisoit cognoistre aysement ce qu'il estoit, ayant le derrière tout descouvert, et que ceste action n'estoit qu'une gentillesse de Singe : de mesme ce Satyre, bien qu'il eust pris la figure, la voix, et le discours de l'homme, nous fera voir aysement, si nous le tournons par derrière, que c'estoit un tour de Satan, Singe malicieux du Très Hault, et que ceste apparence extérieure couvroit un Démon, dont la cautelle s'efforçoit de surprendre la croyance, et estonner la saincteté de ce bon hermite. Mais, affin de traicter ceste matière avec une plus claire et facile intelligence, nous en déduirons l'Histoire entière par le texte de Sainct Hierosme, sans en rien obmettre, ny rien obscurcir pour la briefveté : affin de faire toucher au doigt et à l'oeil les preuves manifestes et indissolubles que nous tirerons, tant