LIVRE IV. I

Dieux toutes sortes de monstres prodigieux et estranges, et soudain ceste beste hydeuse, d'une vitesse aislée, se desroba de devant ses yeux. Voilà succintement quel estoit ce Satyre, et de quels propos il entretint ce sainct homme.

Or, jaçoit que tant de sçavans personnages ayent estimé qu'il estoit homme, et que Sainct Hierosme mesme, sur Isaye, semble avoir tenu que les Faunes et Sylvains estoient des hommes forestiers, ainsi qu'il les nomme, si est-ce pourtant que je ne puis en ceste occasion adjouster mon calcul et ma febve à leurs suffrages, et soubscrire à leur opinion. Et bien qu'il peut suffire, pour prouver manifestement que ce Satyre ne pouvoit estre un homme, de dire qu'il n'y a point d'autre espèce d'hommes que les Adamiques, comme nous avons discouru, encore est-il facile d'en tirer de l'intérieur de ceste Histoire, des tesmoignages infaillibles, et qui me font estonner comment tant de doctes et reli-

gieux personnages ont passé par dessus, sans les remarquer, leur estant certes arrivé comme à cet Epizelus Athénien, lequel à la journée de Marathon vit un spectre devant luy, qui s'approchant et traversant sa personne luy osta la veue : car ce fantosme Satyrique semble les avoir aveuglez, et passant en leur cognoissance, leur avoir osté la cognoissance de ce qu'il estoit.

S'il estoit vray que ce Satyre fust homme, comment se pourroit-il faire qu'il eust esté envoyé de sa trouppe vers S. Anthoine en Ambassade? Ambassade, certes, d'un appareil extraordinaire, et d'un nouvelle suite. D'où ces hommes pouvoient-il sçavoir qu'il devoit venir en ces quartiers, pour le trouver si à propos ? Quels Prophètes leur avoient predict ? Quels Anges leur avoient annoncé ? Et quels Démons les en avoient advertis ? Car ce bon Hermite avoit résolu son voyage sur une révélation qu'il avoit eue la nuict précédente, et