CHAPITRE III

POREST, BVISSONS ET GARENNES DV DOMAYNE DE BERRY.

En la paroisse St-Martin d'Auxiny, distant de la ville de Bourges trois lieues, y a vnne belle forest, appellée la forest du Roy, aultrement la forest d'Haulte Brune, joignant laquelle est le chasteau de la Salle-le-Roy, auquel il y a vn capitaine qui a xxij liures x solz T. (tournois) de gaiges touts les ans.

Une aultre pièce de boys tailliz appelé la Main-Ferme, auprez duquel y a vn Prieuré de Moynes blancs appelle Blozon, d'assez bon reuenu, mais mal entretenu, en laquelle forest les habitans d'Auxigny prétendent droict de glandée , pascaige , et vsage de bois mort, et mort bois tumbé, et aussy ont droict de panaige pour leurs bestes, pour lequel ils payent pour chascun porceau quatre deniers parisiz , pour chascun chef d'homaille deux deniers tournois.

En la paroisse d'Arcay y a vn bois tailliz contenant enuiron quatre vingtz arpents, partant par égale moictie auec les vénérables de l'église de Moustier, moyen de Bourges.

A Yssouldun, vnne grande forest appelée Cheuure, auec vn buisson appelle la garenne du Roy, distante de la ville d'Issouldun de trois lieues, et le long d'icelle forest y a vnne belle Âbaye de Moynes noirs, appellée Cheseaubenoist.

Près la ville de Vierzon y a vn bois tailliz et fort buisson, appelle le Bois d'Eure, ayant de longueur vnne lieue francoise ,

et au plus large , demye bonne lieue , auquel bois y a grand nombre de bestes rousses et noires qui y sont soigneusement gardées par le Seigneur de la Loue, garde héréditaire dudict bois, lequel est du Midy, faisant vnne isle entre les riuières d'Eure et de Cher.

Du costé de Septentrion tirant à la Souloigne , y a vn aultre bois de haulte fustaye, distant de Vierzon demye lieue , lequel de Midy au Septentrion a de trauerse vnne bonne lieue, et de longueur de l'Orient à l'Occident, vnne lieue et demy ; et sont lesdictz deux bois de la seigneurie et domaine dudict Vierzon.

Il y a encore la forest d'Alloigny, laquelle contient en longueur vnne lieue, et de largeur demye lieue.

La forest de S. Laurent sur Baranjon laquelle contient enuiron cinq lieues de circuit, et de largeur deux lieues.

Et s'y a plusieurs aultres forestz, bois , et buissons , qui appartiennent à diuers Seigneurs, dont des principales le feray mention en leur lieux.