CHARLES VIII A LA VILLE DE REIMS

(Parthenay, 3o Mars 1487.)

Très chiers et bien amez, vous avez esté assez advertiz, comme le sieur de Dunois et autres ses adhérens se sont par cy devant efforcez et efforcent de mettre plusieurs troubles et divisions en notre royaume contre notre auctorité et à la grant foule et charge de notre peuple et subgectz ; et combien que par plusieurs foiz, tant par les lettres que aultres doulces et amyables voyes , nous les ayons enhortez et fait amonester d'eulx retirer et délaisser telles mauvaises façons de faire, ilz ne s'en sont vouluz déporter, ayns ont tousjours de plus en plus continué et persévéré, dont très fort nous a despieu et desplaict, car telles résistances ne puent estre fêtes qu'il ne conviengne faire grant assemblée de gens de guerre , et vous savez que s'est tousjours à la grant foule de notredit peuple, et est la chose au monde que plus nous tient au cueur, et en avons tousjours désiré et désirons le soulagement, aussi à la charge de noz finances. Pour lesquelles causes , dimenche derrenier, nous estans en notre ville de Nyort, envoyasmes à Partenay notre très cher et très amé cousin , le conte de Montpensier et notre cousin , le sire de Gyé , mareschal de France , et en leur compagnie , de noz capitaines et gens de guerre , lesquelz à leur arrivée , trouvèrent dedans Partenay le sire de Joyeuse et certain nombre de gens de guerre , tant de noz subgectz que aultres qui leur tirèrent plusieurs coups d'artillerie et sortirent en armes en grant nombre à rencontre d'eulx pour les grever s'ilz eussent peu , et de fait se fortiffièrent dedans aucunes maisons des faulxbourgs dudit Partenay pour les bruUer, affin de mieux venir

à leur mauvaise fin et dampnée entreprise. Maiz iceulx noz cousins , capitaines et nosdits gens de guerre les rebouttèrent en manière qu'ilz furent contraincts eulx retirer bien tost en ladite ville et depuis, tant d'artillerie que de traict d'arbalestres, ont tué et blessé de nosdites gens de guerre. Et le jour ensuivant y ala nostre très chier et très amé oncle le duc de Bourbon , connestable de France, lequel leur fit faire commandement de par nous de mettre icelle ville et place en noz mains et la luy baillier pour nous , ce qu'ilz ne voulurent faire. Et à ceste cause y sommes venuz en personne et fait amener notre artillerie dont ilz ont esté si pressez qu'ilz ont estez contraincts eulx rendre à notre voulenté et estions bien délibérez d'en faire griefve pugnition à l'exemple de tous aultres nos rebelles et désobéyssans. Toutesvoies, pour ce que notre tante de Dunois est venue devers nous et aussi devers notredit oncle le connestable, pour nous supplier et requérir que notre plaisir fut les en laisser aler leurs vies et bagues sauves, tant à la requeste de notredite tante, laquelle savons estre très desplaisant des choses que ledit sieur Dunois, sonmary, fait, que aussi de notredit oncle le connestable qui nous en a pryé pour amour d'elle, avons esté contens que ledit de Joyeuse et gens de guerre estans avecques luy s'en soient allez, c'est assavoir les gens et serviteurs domestiques de notre frère d'Orléans et dudit sieur de Dunoys , devers eulx en nombre environ xlv hommes telz quelz, et le seurplus, moyennant le serment qu'ilz nous ont fait, s'en vont en leurs lieux et maisons, et leur avons fait bailler conduicte. Et est entré en ladite ville notredit oncle avecques tel nombre de noz gensdarmes qu'il nous a pieu. Desquelles choses vous voulons bien advertir comme ceulx que savons désirer le bien et prospérité de nous, noz affaires et de notredit royaume, Et au seurplus, espérons partir d'icy en bref, si bien acompaignez de noz bons et loyaulx parens, seigneurs et serviteurs, pour tirer ailleurs en notredit royaume où nous saurons que besoing sera donner provision , tellement que ceulx qui y ont voulu et

veullent entreprendre sur nous et notre auctorité ne viendront pas au-dessus de ce gu'ilz cuidoyent faire. Et vous prions que de votre part vous y emploiez et nous servez ainsi que toujours avez fait et que en vous nous en avons notre parfaite et entière confidence. Donné à Partenay le pénultième jour de mars. Ainsi signé Charles, et au-dessous Parent.

EXTRAIT DU JOURNAL DE JEHAN FOULQUART PROCUREUR SYNDIC DE LA [VILLE DE REIMS

Du XVIII may 1489 est rapporté que Charles de Pavenay, cappitayne de Ghasteau Thiery, avoit dict audit Foulquart que le jeudy précédent monsieur Desquerdes , lieutenant général pour le roy en son armée de Flandres, estant à Paris avoit receu lettres du roy faisans mention que ses gens en Bretaigne avoient rué jus et tué le conte d'Arondel et cens Anglois de chevaulx avec luy, et qu'il estoit descendu en Bretaigne XIIII mil Anglois dont y en avoit seulement environ xvi*' des plus gens de bien de chevaulx du nombre desquelz estoient les v^ dessusdictz, et que les roys des Romains, d'Espaigne et d'Angleterre sont d'alliance avec ceulx de Bretaigne contre (lacune) ; dict encore plus que la duchesse de Bretaigne a fait sommer ceulx de Dynant où sont quatre censlances d'ordonnances, xii*' arbalestriers et v*' Suisses dont sont chefz les sieurs de Rohan , messyre Gaston du Lyon et le vicomte d'Aunoy avec aultres qui luy ont fait response que , toutefois qu'il luy plaira les aler veoir, ils ly feront bonne chiere et festoiront bien ses gens s'ij.s y vont ; dict aussi que le sieur de la Trimoille est chef de l'armée en Bretaigne comme l'an passé ; dict que les Bretons ont repris toutte la Basse Bretaigne , excepté une ville qu'il n'a sceu nommer; dict que le conte de Dunois maine l'avant garde des Anglois; dict que le roy d'Angleterre dict dernièrement à l'archevesque de Sens et aultres ambassadeui^s du roy qui estoient allez vers luy que le roy est roy des François, mais luy ne l'est pas des Anglois et que le maire de Londres tient en garde en la tour de Londres l'un des filz du roy Edouart dont il le menasse souvent de le faire roy s'il ne faict ce que la commune vouldra; dict que les Anglois dirent ausdictz

ambassadeurs, présent leur roy, que Bretaigne est la petite Angleterre^ et que quant leurdict roy ne vouldroit le faire, s*y bailleront il secours et ayde aux Bretons pour y mettre jusques au dernier home d'Angleterre; dict qu'il a trouvé les instructions que avoit eu le conte de Nassau de par Maximilian qu'on avoit rompu et jecté en ung retraict, et les a rassemblées et veu, et portent que ledict Maximilian requiert premièrement que le Roy restitue la duchesse de Bretaigne en son entier de toutes ses terres, villes et seigneuries et l'en laisse joir paisiblement ; item qu'il mette à playne délyvrance et face retourner au sien franchement le duc d'Orléans, les contes d'Albret etdeDunois, le syeur de Lescut et aultres qui sont en Bretaigne; item que le Roy le laisse venger à son plaisir de ceux de Flandres qui luy ont faict oultrages de tout temps , que le roy tienne le traicté de paix faict à Arras par le feu roy Loys ; item qu'il fasse décider et vuider le différent des duchés et contés de Bourgongne par gens clers et entendus et est contant qu'il se fasse par telz gens que le Roy vouldra prendre et choisir, excepté la cour de Parlement. Ausquels articles et demandes le roy a respondu touchant la Bretaigne qu'il est content que tout soit mis entre les mains de Maximilian et du duc de Bourbon comme neutres et gardiens, jusques à ce que luy et la duchesse oys en leur droict , il en soit dict par justice et que à celuy que faire se devra soit délyvré; et au regard des aultres poinctz, que ledit Maximilian envoyé gens clers et entendus à Gambray et le Roy en y envolera des plus grans de son royaume, affin que par eulx les matières soient débattuz à la raison pour parvenir à paix. Dict que le conte d'Albret a cuidé coucher avec la duchesse par le moien de la douairière de Laval, disant qu'elle estoit sa femme espousée par procureur, mais il a esté gecté hors de la chambre par les cheveulx, et a dict la duchesse que combien qu'elle eust esté contraincte de l'espouser par procureur, sy ne luy avoit elle rien promis à luy et ne le tenoit pas à marit, ne l'auroit jamais; dict

Qoo^^

qu'il a parlé à celuy qui a esté pour le duc de Lorrayne en court quy luy a dict qu'il avoit offert au roy de le servir comme devant, envers et cont]-e tous, en luy rendant sa compagnye de cent lances, la pension qu'il avoit et certaine chose, et lui baillant scellé et les princes d'entour luy de le secourir si ses ennemys l'assaillent; et que le Roy luy accordoit tout, exceptez lesdits scellez, bien estoit content de luy promettre, mais d'en bailler scellez, non; et luy reportoit ceste chose et créoit qu'il en seroit content.

Bibl, NaL fr. 8,334 fol. 354.