ET CE QUE FIT GARGANTUA APRÈS LA BATAILLE

Picrochole, ainsi desesperé, s’enfuit vers l’isle Bouchart, et, au chemin de Riviere, son cheval brancha par terre; à quoy tant fut indigné que de son espée le tua en sa choie ; puis, ne trouvant personne qui le remontasl, voulut prendre un asne du moulin qui là auprès estait ; mais les meusniers le meurtrirent tout de coups et le destrousserent de ses habillemens, et luy baillèrent pour soy couvrir une meschante sequenye. Ainsi s’en alla le pauvre cholérique ; puis, passant l’eau an Port Huaulx, et racontant ses males fortunes, fut advisé par une vieille lourpidon que son royaume luy seroit rendu à la venue des cocquecigraes ; depuis ne sçait on qu’il est devenu. Toutefois, l'on m’a dict qu’il est de présent pauvre gaigne denier à Lyon, cholere comme davant. Et tousjours se guemente à tous estrangiers de la venue des cocquecigraes, espérant certainement, selon la prophétie de la vieille, estre à leur venue réintégré en son royaume.

Après leur retraicte, Gargantua premièrement recensa ses gens, et trouva que peu d’iceux estaient péris en la bataille ; sçavoir est quelques gens de pied de la bande du capitaine Tolmere, et Ponocrates, qui avoit un coup de harquebouze en son pourpoinct. Puis les fit refraischir chascun par sa bande, et commanda es thresoriers que ce repas leur fust definyé et payé, et que l’on ne fist oultrage quelconque eu la ville, veu qu’elle estait sienne : et, après leur repas, ilz comparussent en la place devant le chasteau, et là seroient payés pour six mois. Ce que fut faict : puis fit convenir devant soy en ladicte place tous ceux qui là restaient de la part de Picrochole,' esquelz, presens tous ses princes et capitaines, parla comme s’ensuit.