COMMENT PANCRGE PREND CONSEIL DE EPISTEMON

Laissans la Villaumcre, et retoumans vers Pantagruel, par le chemin Panurge s'adressa à Epistemon, et luy dist : « Compere, mon antique amy, vous voyez la perplexité de mon esprit. Vous sçavez tant de bons remedes. Me sçauriez vous secourir? »

Epistemon print le propos, et remonstroit à Panurge comment la voix publicque estoit toute consommée en mocqueries de son desguisement . et luy conseilloit prendre quelque peu de ellebore, afin de purger cestuy humeur en luy peccant, et reprendre ses accoustrements ordinaires.

« Je suis, dist Panurge, Epistemon mon compere, en phantasie de me marier. .Mais je crains estre coqu et infortuné en mon mariage. Pourtant ay je faict vœu à sainct François le Jeune ( lequel est au Plessis lez Tours réclamé de toutes femmes en grande dévotion, car il est premier fondateur des bons hommes, lesquelz elles appetent naturellement) porter lunettes au bonnet, ne porter braguette en chausses, que sus ceste mienne perplexité d'esprit je n’aye eu resolution aperte.

— C'est, dist Epistemon, vrayement un beau et joyeux vœu. Je m’esbahys de vous que ne retournez à vous mesmes, et que ne revocquez vos sens de ce farouche esguarement en leur tranquillité naturelle.