CHAPITRE XXXVI
COMMENT, PAR LES A.NDOCILLES FAROUCHES, EST DRESSÉE EMBUSCADE CONTRE PANTAGRUEL
Ce disant Xenomanes, frere Jean apperceut vingt et cinq ou trente jeunes andouilles de legiere taille sus le havre, soy retirantes de grand pas vers leur ville, citadelle, chasteau et roquette de cheminées, et dist à Pantagruel : « Il y aura icy de l’asne, je le prevoy. Ces andouilles vénérables vous pourroient, par adventure, prendre pour Quaresmeprenant, quoy qu'en rien ne luy sembliez. Laissons ces repaissailles icy, et nous mettons en debvoir de leur résister. — Ce ne seroit, dist Xenomanes, pas trop mal faict. Andouilles sont andouilles, tousjours doubles et traistresses. » Adonc se leve Pantagruel de table pour descouvrir hors la touche de bois ; puis soubdain retourne, et nous asceure avoir à gauche descouvert une embuscade d'andouilles farfelues, et du cousté droit,' à demie lieue loing de là, un gros bataillon d' aultres puissantes et gigantales andouilles, le long d'une petite colline, furieusement en bataille marchantes vers nous au son des vezc"' et piboles, desguogues et des vessies, des joyeux pifreset tabours, des trompettes et clairons. Par la conjecture de soixante et dix huit enseignes qu’il y comptoit, estimions leur nombre n’estre moindre de quarante et deux raille. L’ordre qu’elles tenoient, leur fier marcher et faces
asceurées, nous faisoient croire que ce n’eotoient friquenelles, mais vieilles andouHles de guerre. Par les premières fillieres jusques prés les enseignes, estoient toutes armées à hault appareil, avec picques petites, comme nous sembloit de loing : toutesfois bien poinctues et asserées. Sus les aisles estoient flanequegées d’un grand nombre de boudins sylvaticques, de guodiveaux massifz et saulcissons à cheval, tous de belle taille, gens insulaires, bandouilliers et farouches. Pantagruel fut en grand esmoy, et non sans cause, quoy que Epistemon luy remonstrast que l’usance et coustume du pays andouillois pouvoit estre ainsi caresser et en armes recevoir leurs amis estrangiers, comme sont les nobles rois de France par les bonnes villes du royaume receuz et salués à leurs premières entrées après leur sacre et nouvel advenement à la couronne, a Par adventure, disoit il, est ce la garde ordinaire de la royne du lieu, laquelle advertie par les jeunes andouilles du guet que vistes sus l’arbre, comment en ce port surgeoit le beau et pompeux convoy de vos vaisseaulx, a pensé que là debvoit estre quelque riche et puissant prince, et vient vous visiter en personne. » De ce non satisfaict, Pantagruel assembla son conseil pour sommairement leur advis entendre sus ce que faire debvoient en cestuy estrif d’espoir incertain et crainte évidente.
Adonc briefvement leur remonstra comment telles maniérés de recueil en armes avoit souvent porté mortel préjudice, sous couleur de caresse et amitié. « Ainsi, disoit il, l’empereur Antonin Caracale, à l’une fois, occist les Alexandrins ; à l’aultre, desfit la compaignie d’Artaban, roy des Perses, sous couleur et fiction de vouloir sa fille espouser. Ce que ne resta impuny : car peu après il y perdit la vie. Ainsi les enfans de Jacob, pour venger le rapt de leur sœur Dyna, sacmenterent les Sichymiens. En cesto hypocritique façon, par Galien, empereur Romain, furent les gens de guerre defaicts dedans Constantinople. Ainsi, sous espece d’amitié, Antonius attira Artavasdes, roi de Arménie, puis le fit lier et enferrer de grosses cbaincs : finablement, le fit occire. Mille autres pareilles histoires trouvons nous par les antiques monumens. Et à bon droit est, jusques à présent, de prudence grandement loué Charles, roy de France sixième de ce nom, lequel retournant victorieux des Flamens et Gantois en sa bonne ville de Paris, et au Bourget en France, entendant que les Parisiens avec leurs maillctz (dont furent surnommés Maillotins) estoient hors la ville issuz en bataille jusques au nombre de vingt mille combattans, n’y voulut entrer (quoy qu’ilz remontrassent que ainsi s’estoient mis en armes pour plus honorablement le recuillir sans aultre fiction ne mauvaise affection ) que premièrement ne se fussent en leurs maisons retirés et désarmés. »
