CHAPITRE LV

COMMENT, EN HAÜLTE MEB, PANTAGRUEL OÜYT DIVERSES PAROLES DEGELÉES

En pleine mer nous banquetons, gringnotans, devizans et faisans beaux et cours discours, Pantagruel se leva et tint en pieds pour discouvrir à l’environ. Puis nous dist ; « Compaignons, oyez vous rien? Me semble que je oy quelques gens parlons en l’air, je n’y voy toutesfois personne. Escoutez. » A son commandement nous fumes tous attentifz, et à pleines oreilles humions l’air comme belles huytres en escalle, pour entendre si voix ou son y seroit espart : et pour rien n’en perdre, à l’exemple de Antonin l’empereur, aucuns oppousions nos mains en paulme derrière les oreilles. Ce néantmoins protestions voix quelconque n’entendre. Pantagruel continuoit affermiftit ouir voix diverses en l’air, tant d’hommes comme de femmes, quand nous fut advis, ou que nous les oyons pareillement, ou que les oreilles nous cornoient. Plus persévérions escoutans, plus discernions les voix, jusques à entendre motz entiers. Ce que nous effraya grandement, et non sans cause, personne ne voyons et entendons voix et sons tant divers, d’hommes, de femmes, d’enfans, de chevaulx : si bien que Panurge s’escria : « Ventre bleu, est ce mocque ? nous sommes perduz. Fuyons. Il y a embusche autour. Frere Jean, es tu là, mon amy? Tiens toy prés de moy, je te supplie. As tu ton bragmart? Advise qu’il ne tienne au fourreau. Tu ne le desrouilles poinct à demy. Nous sommes perduz. Escoutez ; ce sont par Dieu coups de canon. Fuyons. Je ne dis de pieds et de mains, comme disoit Rrulus en la bataille Pharsalicque ; je dis à voiles et à rames. Fuyons. Je n’ay poinct de courage sur mer. En cave et ailleurs j’en ay tant et plus. Fuyons. Saulvons nous. Je ne le dis pour peur que je aye, car je ne crains rien fors les dangiers. Je le dis tousjours. Aussi disoit le Franc arcliier de Baignolet. Pourtant n’hazardons rien, à ce que ne soyons nazardés. Fuyons. Tourne visaige. Vire la peaultre, filz de putain ! Pleust à Dieu que présentement je fusse en Quinquenois à peine de jamais ne me marier! Fuyons, nous ne sommes pas pour eux. Hz sont dix contre un, je vous en asceure. Davantaige ilz sont sus leurs fumiers, nous ne cognoissons le pays. Hz nous tueront. Fuyons, ce ne nous sera deshonneur. Demosthenes dit que l’homme fuyant combattra de rechief. Retirons nous pour le moins. Orebe, poge, au trinquet, aux boulingues. Fuyons de par tous les diables, fuyons. »

Pantagruel, entendant l’esclandre que faisoit Panuige, dist : « Qui est ce fuyard là bas? Voyons premièrement que gens sont. Paradventure sont Hz nostres? Encores ne voy je personne? Et si voy cent mille à l’entour.