Chapitre LVIII

Pauvres humains qui bon heur attendez,

Levez vos cueurs et mes dictz entendez.

S'il est permis de croyre fermement

Que par les corps qui sont au firmament

Humain esprit de soy puisse advenir

A prononcer les choses à venir,

Ou si l'on peut par divine puissance

Du sort futur avoir la congnoissance,

Tant que l'on juge en asseuré discours

Des ans loingtains la destinée et cours,

Je fois sçavoir à qui le veult entendre

Que cest hyver prochain, sans plus attendre,

Voyre plus tost, en ce lieu où nous sommes

Il sortira une manière d'hommes

Las du repoz et faschez du séjour,

Qui franchement iront, et de plein jour,

Subourner gens de toutes qualitez

A différent et partialitez.

Et qui vouldra les croyre et escouter

(Quoy qu'il en doibve advenir et couster),

Hz feront mettre en debatz apparentz

Amys entre eulx et les proches parents ;

Le filz hardy ne craindra l'impropere

De se bender contre son propre père ;

Mesmes les grandz, de noble lieu sailliz,

De leur subjectz se verront assailliz,

Et le debvoir d'honneur et révérence

Perdra pour lors tout ordre et différence,