CHAPITRE LVIII

Car ilz diront que chacun à son tour

Doibt aller haut et puis faire retour,

Et sur ce poinct aura tant de meslées,

Tant de discordz, venues et allées,

Que nulle histoyre, où sont les grands merveilles,

A faict récit d'esmotions pareilles.

Lors se verra maint homme de valeur,

Par l'esguillon de jeunesse et chaleur

Et croire trop ce fervent appétit,

Mourir en fleur et vivre bien petit.

Et ne pourra nul laisser cest ouvrage,

Si une fois il y met le couraige,

Qu'il n'ayt emply par noises et debatz

Le ciel de bruit et la terre de pas.

Alors auront non moindre authorité

Hommes sans foy que gens de vérité ;

Car tous suyvront la créance et estude

De l'ignorante et sotte multitude,

Dont le plus lourd sera receu pour juge.

O dommaigeable et pénible déluge !

Déluge, dy je, et à bonne raison,

Car ce travail ne perdra sa saison

Ny n'en sera délivrée la terre

Jusques à tant qu'il en sorte à grand erre

Soubdaines eaux, dont les plus attrempez

En combatant seront pris et trempez,

Et à bon droict, car leur cueur, adonné

A ce combat, n'aura point perdonné

Mesme aux troppeaux des innocentes bestes,

Que de leurs nerfz et boyaulxdeshonnestes

Il ne soit faict, non aux Dieux sacrifice,

Mais aux mortelz ordinaire service,

Or maintenant je vous laisse penser

Comment le tout se pourra dispenser

Et quel repoz en noise si profonde

Aura le corps de la machine ronde !

Les plus heureux, qui plus d'elle tiendront.

Moins de la perdre et gaster s'abstiendront,

Et tascheront en plus d'une manière

A l'asservir et rendre prisonnière

En tel endroict que la pauvre deffaicte

N'aura recours que à celluy qui l'a faicte ;

Et, pour le pis de son triste accident,

Le clair soleil, ains que estre en Occident,

Lairra espandre obscurité sur elle

Plus que d'eclipse ou de nuyct naturelle,

Dont en un coup perdra sa liberté

Et du hault ciel la faveur et clarté,

Ou pour le moins demeurera déserte.

Mais elle, avant ceste ruyne et perte,

Aura longtemps monstre sensiblement

Un violent et si grand tremblement,

Que lors Ethna ne feust tant agitée

Quand sur un filz de Titan fut jectée ;

Et plus soubdain ne doibt estre estimé

Le mouvement que feit Inarimé

Quand Tiphœus si fort se despita

Que dens la mer les montz précipita.

Ainsi sera en peu d'heure rengée,

A triste estât, et si souvent changée,

Que mesme ceulx qui tenue l'auront

Aulx survenans occuper la lairront.

Lors sera près le temps bon et propice

De mettre fin à ce long exercice :