CHAPITRE XXVII Izjl
cloz vendangeoient, — car les porteguydons et port'enseignes avoient mys leurs guidons et enseignes l'orée des murs, les tabourineurs avoient défoncé leurs tabourins d'un cousté pour les emplir de raisins, les trompettes estaient chargez de moussines, chascun estoyt desrayé, — il chocqua doncques si roydement sus eulx, sans dyre guare, qu'il les renversoyt comme porcs, frapant à tors et à travers à vieille escrime.
Es uns escarbouilloyt la cervelle, es aultres rompoyt bras et jambes, es aultres desiochoyt les spondyles du coul, es aultres demoulloyt les reins, avalloyt le nez, poschoyt les yeulx, fendoyt les mandibules, enfonçoyt les dens en la gueule, descroulloyt les omoplates, sphaceloyt les grèves, desgondoit les ischies, debezilloit les fauciles.
Si quelq'un se vouloyt cascher entre les sepes plus espès, à icelluy freussoit toute l'areste du douz et l'esrenoit comme un chien.
Si aulcun saulver se vouloyt en fuyant, à icelluy faisoyt voler la teste en pièces par la commissure lambdoïde.
Sy quelq'un gravoyt en une arbre, pensant y estre en seureté, icelluy de son baston empaloyt par le fondement.
Si quelq'un de sa vieille congnoissance luy crioyt:
« Ha, Frère Jean, mon amy, Frère Jean, je me rend!
— Il t'est (disoyt il) bien force; mais ensemble tu rendras l'ame à tous les diables. »
Et soubdain luy donnoit dronos. Et, si personne tant feust esprins de témérité qu'il luy voulust résister en face, là monstroyt il la force de ses muscles, car il leurs transperçoyt la poictrine par le mediastine et par le cueur. A d'aultres donnant suz la faulte des coustes, leurs subvertissoyt l'estomach, et mouroient soubdainement. Es aultres tant fièrement frappoyt par le nombril qu'il leurs faisoyt sortir les tripes. Es aultres parmy les couillons persoyt le boiau cullier. Croiez que c'estoyt le plus horrible spectacle qu'on veit oncques.
Les uns cryoient : Saincte Barbe!
les aultres: Sainct George!
les aultres : Saincte Nytouche !
les aultres: Nostre Dame de Cunault! de Laurette! de Bonnes-Nouvelles! de la Lenou! de Rivière!
les ungs se vouoyent à sainct Jacques ;
les aultres au sainct suaire de Chambery, mais il brusla troys moys après, si bien qu'on n'en peut saulver un seul brin;
les aultres à Cadouyn;
les aultres à sainct Jean d'Angery ;
les aultres à sainct Eutrope de Xainctes, à
