CHAPITRE XXXII iél
se, et d'abondant luy donnoit la mestavrie de la Pomardiere à perpétuité, franche pour luy et les siens. Pour le tout conduyre et passer fut envoyé Gallet, lequel par le chemin feist cuillir près de la Sauloye force grands rameaux de cannes et rouzeaux, et en feist armer autour leurs charrettes, et chascun des chartiers; luy mesmes en tint un en sa main, par ce voulant donner à congnoistre qu'ilz ne demandoient que paix et qu'ilz venoient pour l'achapter.
Eulx venuz à la porte, requirent parler à Picrochole de par Grandgousier. Picrochole ne voulut oncques les laisser entrer, n'y aller à eulx parler, et leurs manda qu'il estoit empesché, mais qu'ilz dissent ce qu'ils vouldroient au capitaine Toucquedillon, lequel affustoit quelque pièce sus les murailles. Adonc luy dict le bon homme :
« Seigneur, pour vous retirer de tout ce débat et ouster toute excuse que ne retournez en nostre première alliance, nous vous rendons présentement les fouaces dont est la controverse. Cinq douzaines en prindrent noz gens ; elles furent très bien payées ; nous aymons tant la paix que nous en rendons cinq charrettes, desquelles ceste icy sera pour Marquet, qui plus se plainct. Dadvantaige, pour le contenter entièrement, voylà sept cens mille
ir
et troys philippus que je luy livre, et, pour l'interest qu'il pourroit prétendre, je luy cède la mestayrie de la Pomardiere à perpétuité, pour luy et les siens, possedable en franc alloy ; voyez cy le contract de la transaction. Et, pour Dieu, vivons dorénavant en paix, et vous retirez en vos terres joyeusement, cedans ceste place icy, en laquelle n'avez droict quelconques, comme bien le confessez, et amis comme par avant. »
Toucquedillon raconta le tout à Picrochole, et de plus en plus envenima son couraige, luy disant :
« Ces rustres ont belle paour. Par Dieu, Grandgousier se conchie, le pouvre beuveur ! Ce n'est son art aller en guerre, mais ouy bien vuider les flascons. Je suis d'opinion que retenons ces fouaces et l'argent, et au reste nous hastons de remparer icy et poursuivre nostre fortune. Mais pensent ilz bien avoir affaire à une duppe, de vous paistre de ces fouaces ? Voylà que c'est : le bon traictement et la grande familiarité que leur avez par cy davant tenue vous ont rendu envers eulx contemptible : oignez villain, il vous poindra; poignez villain, il vous oindra.
— Çà, çà, çà, dist Picrochole, sainct Jacques, ilz en auront ! Faictes ainsi qu'avez dict.
— D'une chose, dist Toucquedillon, vous
