Chapitre XXXVIII

e propos requiert que racontons ce qu'advint à six pèlerins, qui venoient de Sainct Sebastien, près de Nantes, et pour soy herberger celle nuict, de peur des ennemys, s'estoient mussez au jardin dessus les poyzars, entre les choulx et lectues. Gargantua se trouva quelque peu altéré et demanda si l'on pourroit trouver de lectues pour faire sallade, et, entendent qu'il y en avoit des plus belles et grandes du pays, car elles estoient grandes comme pruniers ou noyers, y voulut aller luy mesmes et en emporta en sa main ce que bon luy sembla. Ensemble emporta les six pèlerins, lesquelz avoient si grand paour qu'ilz ne ausoient ny parler ny tousser.

Les lavant doncques premièrement en la fontaine, les pèlerins disoient en voix basse

l'un à l'autre: a Qu'est il de faire? Nous noyons icy, entre ces lectues. Parlerons nous? Mais, si nous parlons, il nous tuera comme espies. » Et, comme ilz deliberoient ainsi, Gargantua les mist avecques ses lectues dedans un plat de la maison, grand comme la tonne de Cisteaulx, et, avecques huille et vinaigre et sel, les mangeoit pour soy refraischir davant souper, et avoit jà engoullé cinq des pèlerins. Le sixiesme estoit dedans le plat, caché soubz une lectue, excepté son bourdon qui apparoissoit au dessus. Lequel voyant, Grandgousier dist à Gargantua:

« Je croy que c'est là une corne de limasson : ne le mangez poinct.

— Pourquoy ? (dist Gargantua). Hz sont bons tout ce moys. »

Et, tyrant le bourdon, ensemble enleva le pèlerin, et le mangeoit très bien ; puis beut un horrible traict de vin pineau, et attendirent que Ton apprestast le souper.

Les pèlerins ainsi dévorez se tirèrent hors les meulles de ses dentz le mieulx que faire peurent, et pensoient qu'on les eust mys en quelque basse fousse des prisons, et, lors que Gargantua beut le grand traict, cuyderent noyer en sa bouche, et le torrent du vin presque les emporta au gouffre de son estomach ; toutesfoys, saultans avec leurs bourdons, comme