XXIV. — Cornent li Tur de Damas barroierent Jherusalem

En ce point que je vous ai dit estoit li aferes de secorre le roi. Lors vint Bezeuge de qui je vos parlai dessus, qui estoit cônes-

tables le roi de Damas, et se prist bien garde que li roiaumes de Surie estoit en mauves point, car li rois estoit assis en estrange païs à grant meschief ; li chevalier et tuit li pueples estoient issu de la terre por aidier le roi et touz les autres barons. Quant il sot que la terre estoit einsi vuidiée, bien se pensa que li poinz estoit par que il pooit grever le roiaume de Jherusalem sanz grant péril. Lors assembla chevaliers et genz assez, si s'en entra en la terre de Surie. Tant chevaucha qu'il vint à la cité de Naples qui n'estoit mie fermée de bon mur; fossé h'i avoit point ne barbacanes nules. Legierement entra dedenz la ville, car cil du païs ne se gardoient mie de tele chevauchiée. Ceus qu'il trova léans découpa, il et sagent, sans nul espargnier ; les femmes, les enfans, les vieuz homes qui garantir ne se pooient ne défendre, mistrent touz à Tespée. Aucuns en i ot des plus forz qui montèrent en une forteresce qui estoit eu milieu de la cité ; léanz se recueillirent et menèrent avec eus leur femmes et leur enfanz, ceus qu'il porent escorre à leur anemis. Li Tur corurent par la ville tout abandon, les mesons cerchoient à leisir ; ce qu'il trovoient d'homes ou de femmes estoient ou mort ou pris; robes et avoir enporterent tout, quanque en avoit en la ville. Après, mistrent le feu premièrement es moustiers : si ardirent toute la cité. Cil qui s'estoient fichié en la forteresce orent grant peor et grant angoisse du feu, mes toutevoies s'en eschaperent. Quant Bezeuge et sa gent orent fet ce gaaing, tuit s'en retornerent en leur païs sanz rien perdre, car onques n'avoient trové qui rien leur contredeist.