XXV. — Cornent li rois rendi Mont Ferrant à Sanguin

Grant peine metoit Sanguins à prendre le chastel où li rois estoit. Engins de maintes manières fesoit giter léanz, de jorz et de nuiz. Tant i venoit de grosses pierres qu'elles fondoient près toutes les mesons de la ville, si que pou trovoit-l'en lieu où Ton se poïst garantir. Tant i avoit d'archiers et d'arbalestiers

qui ne finoient de trere, que mainz en navroient dedenz le chastel. Et une chose i avoit qui trop estoit greveuse, car ne les navrez ne les autres malades n'avoit-Pen où repondre sauvement, por les perrieres et les mangoniaus qui tout froissoient, si que nus leus n'i estoit aseur. N'i avoit si hardi léans qui chascun jor ne cuidast estre au point de la mort. Sanguins qui moût estoit crueus et ententis à celé besoigne, s'angoissoit moût et ardoit de haster la prise du chastel; relés i fesoit d'assailleeurs, car il avoit gent assez, si que toutes eures livroient tant de peine à ceus dedenz que touzjorz estoient en assaut. Li nostre qui estoient enclos dedenz ne pooient mie einsi changier les defendéeurs, car il n'en avoient mie si grant plenté come ceus dehors. Si leur en covenoit à sofrir le fés commun aument. Chascun jor apetiçoit leur nombre, car il en i avoit assez de navrez aus assauz. Li pluseur acouchoient malade d'autres maladies. Une chose i avoit qu'il ne porent pas sofrir : près que touz les covenoit à veiller por fere les guez toutes les nuiz. L'endemain, sitost com il ajornoit, recomençoit li assauz de toutes parz, fiers et aspre, si que cil n'avoient point de loisir d'eus reposer; moût en estoient plus vain et lasche. Une autre chose les redestregnoit moût : quant li rois et li autre baron vindrent eu chastel, n'i mistrent point de viande, car celé qu'il aportoient fu perdue. Si troverent la ville qui avoit jà esté grant pièce assise, toute soufraiteuse de viande; dont il leur estut, sitost com il vindrent, à mengier leur chevaus. Quant il furent failli, grant mesese orent de fain. Lors véissiez les bons chevaliers et les forz bachelers qui ne se pooient sostenir, ainçois les covenoit apoier à bastons quant il aloient : dolors et pitiez estoit de ce veoîr. L'aceinte du chastel n'estoit pas moût large, mes selonc ce que il i pooit entrer de gent, ele estoit toute pleine de viandes; il n'avoient dont il se poissent desjeuner. Les rues estoient toutes jonchiées de malades; li sain meismes qui ne pooient chevir es mesons, gisoient par les places. Li Tur savoient bien le covine de ceus dedens; si tesoient trere moût sovent à la volée, par que il en i avoit mainz et morz et navrez. Sanguins qui bien savoit la mesese de ceus

qu'il avoit assis, se hastoit à la ville prendre de tout son pooir; ses genz amonestoit d'assaillir eiforcieément. Sur toute rien fesoit garder que nus dedens ne poïst issir hors, et que cil dehors ne poissent entrer dedenz. Aus granz sofretes que cil dedenz avoient n'avoit que un seul confort, ce que il avoient espérance que li princes d'Antioche, li cuens de Rohés et li pueples de Jherusalem les venissent secorre; et, porce que la fains et l'autre mesese les angoissoit moût, bien leur sembloit que cil secors tardoit trop : [ce meismes que cil dehors dotoient que Ten les levast du siège, les fesoit plus angoisseusement emprendre la besoigne. ]