CHAPITRE XXVII

d'entamer sa réputation ou blesser son ame : mais qu'il espéroit, puis que la chose estoit jà descouverte, que tous ces dangers pourroyent estre évitez sans tuer personne.

« Laissez, je vous supplie, ceste espérance, Sire par trop doux et clément, dit l'un de ces vieillards : car tels conjurez pourront par aventure bien estre tuez, si l'on y va incontinent, mais de les prendre il est impossible, si ce n'est un ou deux, et encores non sans meurtre et tuerie, que vous voulez néantmoins éviter. Et quand bien vous vous sauveriez de leurs aguets et embusches , pour le moins ne pourrez vous eschapper une quatriesme guerre civile : et alors seronsnous contraints de voir pour la quatriesme fois les pilleries, bruslemens, ruines, dégasts et embrasemens, dont vos Gaules fument encores et en sont misérables. Et en voulant par trop espargner vos ennemis certains et jurez, vous aurez, contre vostre vouloir et intention, esté cruel envers la patrie et prodigue de vos bons et loyaux sujets et serviteurs. C'est ce blasme, Sire, d'avoir comme trahy le pays, c'est ceste charge et remors de conscience, qu'il faut craindre et avoir en horreur. Car au reste, tout homme de bien et équitable approuvera un acte si beau et si nécessaire , lequel nous savons vous estre loisible par toute raison, de droict divin et humain : et n'y auroit pas faute d'exemple que nous pourrions vous alléguer, si la matière requéroit un long discours, plustost qu'une prompte exécution. Et pourtant, Sire, sauvez-vous, sauvez la royne vostre mère, sauvez nous tous, sauvez le pays.

« Le roy esmeu de ces propos, après avoir demeuré quelque temps comme fiché en une profonde pensée, leur dit en fin, avec une voix et contenance triste : puis que donc il vous semble estre ainsi le plus expédient et convenable aux lois divines et humaines, je consens qu'il se face. Dieu me soit tesmoin et juge que ce que j'en entreprens est à mon grand regret, et pour me garder d'estre surpris et non pour autruy surprendre. Lors après avoir fait appeler ses plus confidens et ceux qui luy sembloyent les plus propres pour exécuter l'afaire, il leur donna le mot et le commandement, avec charge expresse de ne toucher qu'aux conspirateurs, desquels les noms avoyent esté déférez et mis par escrit. Sur tout d'empescher qu'il n'y

eust sédition, tumulte ny esmotion populaire, afin que les innocens n'endurassent pour les coulpables.

« Comme jà ils partoyent pour aller exécuter Je commandement, il les rappelle une fois, deux fois, trois fois. Et ayant par trois fois révoqué et autant de fois réitéré le mandement, il ne luy estoit possible de persister en la résolution qu'il avoit prinse par l'avis de son Conseil, jusques à ce qu'il fut comme tancé par tous les seigneurs du Conseil, qui estoyent auprès de luy.

« Ainsi donc fut faite l'exécution sur le matin du jour et feste de Sainct-Barthélemy : mais, comme il avient ordinairement en telle chose, quelques-uns des conspirateurs eschappèrent , et quelques autres qui n'avoyent point conjuré y furent tuez. Et mesmes la commune de Paris entendant que l'on avoit voulu attenter à la personne du roy, et conspiré de le tuer, et après saccager la ville, irritée du péril de son prince et du sien propre, portée aussi de quelque haine contre la religion nouvelle, se rua furieusement sur plusieurs qu'elle pensoit estre aussi bien associez à l'amiral en la conspiration, comme ils lui estoyent compagnons et partisans en sa religion. Ce mal s'estendit encore plus outre en quelques villes de France, de sorte que contre la volonté et l'édit du roy, sous tel prétexte plusieurs y furent tuez.

« Il n'y a personne qui en ait esté si marry ni indigné que Sa Majesté : mais, comme je disois au commencement de ceste lettre, seigneur Elvide, telle est la nature de la populasse, que ou bien elle se tient quoye oisivement, ou bien se mutinant d'une extrême violence, se desborde à toute cruauté , et ne garde moyen ni mesure quelconque. Outre ce, il n'y a jamais faute parmy les hommes, en quelque part du monde que ce soit, de haines, envies, noises, querelles et procès. De tous lesquels maux nostre France, à raison des trois précédens troubles, regorgeoit de toutes parts. Et partant, tandis que les uns pensent à revanger leur prince, les autres à venger leurs injures particulières, les autres à soûler leurs haines, les autres à piller et butiner, on ne se souvient point de la volonté du roy, on n'oit point ses édits, on luy fait naistre infinies occasions de douleurs, regrets et fascheries : car il ne fut en sa vie en telle peine et ne porta