RECOMMANDATION DES BERNOIS POUR FAREL
Archives de Genève. Portefeuilles des pièces historiques. Lettres de Berne. Dossier N° 1090.
Nobles, magniffiques seigneurs, singuliers amys et trèschiers combourgeois, nous avons estes informés de la violence et force que l'on a voulsuz fayre par cy devant à nostre maistre Guillame Farel, annunciateurs de la parolle de Dieu en vostre cité; de quoy à cause qu'ilz az de nous commission et lettres adressantes à tous nous alliés et bourgeoys, de l'avoir par recommandé et le bien, pour l'amour de nous, tractier, summes estes malcontents. Ce nonobstant, alheurs ne vous en avons voulsuz fayre remonstrance, espérant que y mectriés ordre nécessayre, et y fériés punition deue, pieça summes advertis que non seulement n'y avés pourveuz puisque tousjours la persécution contre la loy évangélique est plus horrible, de quoy nous merveillons grandement. Â ceste cause, summes occasionnés de vous faire remonstrance sur cella. Premièrement summes esbays que en vostre cité la loy et foy de Jésu Christ et ceulx que la veulent ensuivre sont ainsy perséquutés et molestés, assavoir que ne voullés souffrir qoe la parolle de Dieu soyt libérallement annuncée, ains déchassés les prêcheurs d'icelle, qu'après avés bannis ung homme de bien à jamaix sur poinne de mort, pour ce qu'ilz az parlé contre la messe sans avoir estre ouye sa rayson, et nonobstant que plusieurs gens de bien vous bourgeois et habitans rière vous ayent voulsuz prendre la cause à eulx, voulens vériffier cella, dont vous voulons prier et affectueusement admonester sur ce advoir advis et y mettre ordre, considérant que sy en vostre ville l'évangille de Dieuz doyt estre ainsy perséquuté, laquelle parthye nous , vous , bourgeoys , tenons que cella vous
pourrés redouder à grand préjudice et inconvéniant, pourtant vuillés permettre que la vérité aye lieuz et que soyt licite et ioysible que ceulx que en vostre ville veulent parler et vivre selon le sainct évangille de Jésu Christ, que cella puissent fayre sans estre molestés ne affligés, et la parolle de Dieu libéralement annuncée. Vous davantaige admoneslans de vivre sainctement selon le sainct évangille et permectre que les amateurs de la parolle de Dieuz puissent résister et publicquement contradire à iceux que en vostre ville prêchent, quant y parleront comme séductevrs, et que justice leur soyt ouverte et demeurent administréez. Nous vous prions aussy que de la lectre de recommandation qu'avons donnée à ung imprimeur et aux aultres que cy après vous escriprons, vuilliés fayre fayre plus grande estime que jusque icy aves faict, affin que puissons congnoystre que ayes désir de nous, en choses licites et raysonnables, complayre, et affin que puissions de vous, nous très-chiers bourgeoys, entendre que ne voullés laisser perséquuter la loy de Jésu Christ et nous tenir en plus grande estimation que par cy devant en cestuy endroyt n'aves faict. Désirons sur ce vostre response par présent pourteur, sur ce nous sçavoir conduisre. — ^Datum XX® martii, anno xxxiij. L'advoyer et Conseils de Berne.
Cette dépêche est répétée verbalement à Noël 1533.
