Sur la Dordogne, au sud-ouest de Rib^irac

part et d'ung papiste ; mais j'espère, moiennant l'aide de nostre Dieu, de les bien recepvoir s'ils y viennent, et qu'ils ne mettront en ceste place le pied, ou ilz me passeront sur le ventre.

Vous n'oblierez aussy de faire entendre à mondict Seigneur les fortifications que j'ay faictes et fois faire de jour à aultre, et comment par le moien de ce et de la garnison que je tiens, je tiens, grâce à la bonté de nostre Dieu, ce passaige asseuré et ses environs, pour tous ceulx qu'il plèra à mondict Seigneur y envoyer et faire passer, et que, aultrement, il n'y auroit aultre moien de passaige ne seureté pour tous les nostres.

Au surplus, dire à mondict sieur que je le supplie trèshumblement vous vouloir despêcher en diligence, d'aultant que la chose requiert extresme diligence, et s'asseurer que je luy feraye service très-humblement jusques à la dernière goutte de mon sang, et pour son particulier et pour le général, que je le supplie croire qu'il n'y a gentilhomme en France qui de meilleure volunté expose bien et vie que moy.

Et faudra bien remonstrer que ledict lieu de Parcou n'est autrement fort, ne fermé, ne commode à garnison, sinon pour une retraite de voleurs et gens de mauvaise [vie]. Pour des quels purger le pais sera de besoing de faire desloger les susdicts, et aussi prier mondict sieur de me mander comment il luy plèra que je me gouverne en ces affaires, affin d'appaiser beaucoup de gentilz hommes, qui seront pour courir sus aux susdicts, si bientost il ne plaist à mondict sieur de nous faire entendre sa volunté.