Quant est de la vraye Eglise, nous croyons

qu'elle doit estre gouvernée selon la police que nostre Seigneur Jésus Christ a establie. C'est qu'il y ait des pasteurs, surveillans et diacres, afin que la pureté de la doctrine ait son cours, que les vices soyent corrigés et réprimés et que les pauvres et autres affligés soyent secourus en leurs nécessités et que les assemblées se facent au nom de Dieu, esquelles grands et petits soyent édifiez.

30. Nous croyons tous vrais pasteurs, en quelque lieu qu'ils soyent, avoir mesme authorité et esgale puissance sous un seul chef, seul souverain et seul universel évesque Jésus Christ, et pour ceste cause que nulle église ne doit prétendre aucune domination ou seigneurie sur l'autre.

31 . Nous croyons que nul ne se doit ingérer de son authorité propre pour gouverner l'Église, mais que cela se doit faire par élection, entant qu'il est possible et que Dieu le permet, laquelle exception nous y adjoustons notamment, pource qu'il a falu quelquesfois et mesme de nostre temps, auquel Testât de l'Église estoit interrompu, que Dieu ait suscité gens d'une façon extraordinaire pour dresser l'Église de nouveau, qui estoit en ruine et désolation. Mais quoi qu'il en soit, nous croyons qu'il se faut tousjours conformer à ceste reigle : que tous pasteurs, surveillans et diacres ayent tesmoignage d'estre appelés à leur office.

32. Nous croyons aussi qu'il est bon et utile que ceux qui sont esleus pour estre superintendans advisent entr'eux quel moyen ils devront tenir pour le régime de tout le corps, et toutesfois qu'ils ne déclinent nullement de ce qui nous en a esté ordonné par nostre Seigneur Jésus Christ. Ce qui n'empesche point qu'il