SPOLIA AMPLA

C’est a dire amples depoulles, pour signifier la mémoire eternelle que consacroit ladicte Dame du feu roy. Vis à vis dudict perron en estoit ung autre tout noir, du long d’une grande tour, couronné de deux lyons, au dessoubs desquels pendoit ung entablement graué de ce qui s’ensuit :

Tous ceux qui sont aussi tristes que moy.

S’il est point ung seul en tout le monde,

Et si quelqu’une estre me peult seconde A lamenter la perte de mon Roy.

Viennent icy accompagner la foy Et les regrets de ma douleur profonde,

Âffin qu’a coup toute en larmes ie fonde,

Et que ie meure heureuse en tel emoy.

Roy le plus grand qui ait marché la terre,

Soit pour la paix ou pour mener la guerre,

De ton tombeau soit mon ame ornement.

Mon ame, helas, si depuis le grand tort.

Que luy a fait le malheur de ta mort,

Elle est en moy viuante aucunement.

L’arc de la terrace estoit unye et applanye de sablon, de sorte que les deux perrons pour estre fort cognoissans de l’autre couleur se monstroient beaucoup plus beaux et plus superbes à la veuë et rencontre de tout le monde.

Ce pendant que sa maieste trauersoit la terrace du coste dudict perron Ion fist mettre le feu à ung millier de fuzées, lesquelles comme bazilicqs volans singlans l’air a perte de veuë, allèrent finablement fondre dans les courans du Cher, ou auant que perdre l’alaine, elles petillerent et ronflèrent de sorte qu’on les vit escarteler de telle furie, qu’il sembloit que les eaux mesmes brûlassent.

Mais ce qui fut de plus excellent estoit qu’en la terrace

mesme, il fut mis le feu, a l’instant a deux petites colonnes qui départirent et s’eclatterent en si grans, estranges, et si druz tourbillons et éclairs de flambes séparées et brillantes de tant de couleurs que les yeux ouuers et les bouches beantes, toute la trouppe demeura ung long temps attendant la fin d’ung si grand passe-temps, tant quelles apres auoir lancé leur foudre et par terre et en l’air de part en l’autre, finalement commencèrent a se deppecer en mille et millions de pétards grenades, lances et pots flamboyans d’ond tout le monde, non seulement fut esbay, mais estonne de ioye et grande admiration pour n’auoir esté au-parauant ce iour iamais veu chose semblable.

De ceste terrace le chemin mena sa maiesté droit a ung arc triomphal sumptueux et excellent, d’ond les colonnes, arcades, frizes, retours, pillastres, cornices et architraues estaient dorees : dans son frontispice (sur lequel estait une simple cornice d’or, et sur les tallouers des pillastres ou termes qui l’enfermoient des estandars de taffetas blanc) estoit escript ce qui s’ensuit.

Roy genereux, que la force et vertu A fait chesnu en son adolescence,

Et de qui l’heur égal a la prudence ,

De mil’ honneurs est des-ia reuestu :

Bien tost verras le rebelle abatu ,

Captif aux piez sacrez de ta clemence :

Crier pardon de son outre-cuydance :

D’auoir mutin ton vouloir debatu.

Bien tost verras par ta bouche faconde,

Se gouuerner paisible tout le monde,

Obéissant voluntaire a tes loys.

Toutes les nuits les nymphes de cet eau,

Et les grands dieux qui gardent Chenonceau,

Vont anonçans cet’ augur par ces boys.

Dans le pie-destal des colonnes qui estoient coryn thiennes, il estoil escript en lettres noires.