XV. — 1469, RÉSUMÉ DE L'INTERROGATOIRE DE JEAN RALUE

Et a ceste cause envoya ledit de Verdun Guillaume Lastic devers mondit seigneur de Guyenne ; auquel il fist faire serement de ne le dire a autre que a luy, et le chargea expressément de dire a mondit seigneur qu'il voulloit qu'il fist serment de ne dire riens a personne vivant de ce qu'il demandoit.

Et estoit la créance telle que le Roi avoit dit au président de l'ambassade de Bourgoigne que mondit seigneur de Guyenne le requeroit d'avoir Guyenne, et que ledit président luy dist que le Roy voulloit qu'il eust Champaigne ainsi qu'il avoit promis a mondit seigneur de Bourgogne. Et neantmoins, il chargea a part audit président et au sire de Montagu qu'ilz fissent tous leur povoir que mondit seigneur prensist Guyenne, et l'advertissoit mondit seigneur de Verdun que c'estoit une tromperye et que se mondit seigneur prenoit Guyenne, le Rov prendroit aliances avecques Bourgoigne, et demourroit mondit seigneur a in puris et nudis » et que le Roy donneroit plustost Champaigne a Bourgoigne qu'il ne le fist ainsi.

Pareillement, il luy bailloit plusieurs autres motifs, parquoy il ne devoit point prendre Guyenne ; et l'advertissoit que mondit seigneur de Bourgoigne est plus malcontent du Roy qu'il ne le fut oncques, et qu'il y avoit plus de malcontens en ce Royaume qu'il n'y eut jamès ; et que s'il estoit en Champaigne et il eust les bratz estanduz pour recevoir chascun, tous les malcontens se tireroient devers luy, et conduiroit son envie tousjours de mieulx en mieulx, et viendroit au dessus de ses faiz.

Item, mandoit a mondit seigneur qu'il n'y avoit pas deux jours que on parloit devant le Roy du frère du Roy de Castelle, qui estoit mort, et que le Roy adoncques dist : (c Se Dieu me c( eust fait aussi eureux comme il m'a donné des biens, je (( fusse fort asouvy. Mais j'ay ung frère qui me fait beaucoup « de mal; pleust a Dieu qu'il fust mort et que je n'en eusse (( point. »

Item, lui dit que s'il avoit Champaigne, le Roy le craindroit ; et que s'il estoit en Guyenne, il craindroit le Roy, et que c'estoit grant chose d'estre soubz une grant bannyere.

Item, lui ouvroit plusieurs moyens par protestacions et aultrement, en prenant Champaigne, parquoy il n'y eust jamès eu paix entre le Roy et mondit seigneur son frère.