Louis de Harcourt, patriarche de Jérusalem

aissement audit lieu de Molusson ; et l'a voit chargé de declairer ladite manière à mondit seigneur de Nemours et de le faire savoir audit duc de Bourbon. La manière estoit telle qui s'ensuit : pour cause que le siège pour lors de par le roy estoit à Hérisson* et que à Molusson avoit peu de gens de guerre avec le roy, et qu'il n'y avoit fors que sa garde et aucuns de la charge à monseigneur du Lau et ceulx de l'ostel de monseigneur de Cominge ; aussi qu'il sentoit bien que ceulx de la ville estoient fors enclins faire pour monseigneur de Bourbon; pareillement qu'il se sentoient assez seurs d'aucuns de la compaignie de monseigneur de Torcy, desquelx monseigneur du Lau avoit pour lors la charge, et dont aucuns estoient ses amis et parens, et qu'il avoit deux portaulx audit Molusson et bien legiers à gaigner et tenir ; que monseigneur de Bourbon, qui estoit pour lors à Moulins, n'estoit pas loing de Montagu, pourroit amener avec luy cinquante ou soixante lances et mondit seigneur de Nemours autant, et entrer par moyens dedans Molusson et aller tout droit à la maison du roy, et ne trouveroient pas grant résistance, et se trouveroient les plus fors, et pourroient demander mercy et pardon au roy, et, soubz ceste forme en luy affermant le vouloir servir et trouvoir manière de pacifier les divisions commancées. Et, pour ce que monseigneur de Cominge estoit illec, ilz pourroient aller vers luy pour luy persuader à estre content de ce; et, s'il se monstroit roide et entier, sans vouloir consentir ad ce, le pourroient détenir en son logeys, affin que par son moyen laditte forme de faire ne fust empeschée. Et, oultre plus, ledit patriarche dist qu'il y aideroit fort de sa part et que, s'il veoit que aucun bruit fust, il se trouveroit aux fenestres pour demouvoir les entreprinses qui verroit et leur diroit que tout se feroit du vouloir du roy.

Lequelles [paroles] furent rapportées à monseigneur de Nemours par ledit de Langhac, sur le point qu'il vouloit envoyer son seneschal de la Marche vers monseigneur de