CHAPITRE LXXVIII

Comment les Françoys vindrent, et le grant honneur qu'on leur fist.

QUANT le seigneur de Saintré et sa très belle compaignie furent de la cité de Coulongnes à demye journée près, place ordonnée où l'empereur et l'emperiere furent venuz pour veoir les armes, firent à leurs gens savoir que là estoient, et qu'ilz seroient à eulx au soupper. Laquelle venue sceue, l'empereur au devant eulx envoya son cousin le duc de Brunsvich, pour conduire le seigneur de Saintré, et neuf contes viz à viz chascun des aultres, et avecques eulx plusieurs barons, banneretz, chevaliers et escuiers, tous nobles hommes grandement accompaignez ; et ainsi fut. Et quant ilz furent assez près de la ville, l'empereur ordonna que les deux contes et huit barons, qui délivrer les dévoient, feussent tous vestuz pareilz, ainsi que les Françoys estoient, et au devant d'eulx bien et grandement accompaignez ; et ainsi fut que très grans joyes et honneurs se firent. Lors, ainsi comme

l'empereur eut ordonné, chascun d'eulx à la senestre de son compaignon se mist, quelconques prières que les Françoys feissent, et à la dextre les premiers contes. Et en celle belle ordonnance et compaignie, par la cité et devant le palais où l'empereur et l'emperiere estoient, furent conduytz en leurs hostels. Des aultres serimonies et ordonnances des heraulx, des trompetes et des menestriers, pour abréger, je me passe ; aussi des honneurs et des bonnes chères que les ungs aux aultres firent, par l'espace de quinze jours que illec séjournèrent.