CHAPITRE LXXIX
Comment la bataille fut , et l' ordonnance de l'empereur.
L'acteur. — Le huitiesme jour après leur venue, fut jour ordonné que la bataille seroit. Les lices faictes, l'empereur en son hourt, accompaigné des princes de sa court, et d'aultres princes et barons venuz
pour veoir les armes, et l'emperiere en son hourt à la senestre, accompaignée de maints princes et d'aultres dames de grant façon, l'empereur demanda premier le cry du seigneur de Saintré nommément, et de ses neuf compaignons, lesquelz au second appel furent venuz. Et ainsi fut il des Allmans, dont, pour abréger, à très belles et grandes compaignies vindrent. Et quant les ungs et les aultres en leurs pavillons furent, et eurent faits leurs sermens acoustumés, l'empereur les fist yssir d'une part et d'autre, leurs coctes d'armes vestues, que très belle chose estoit, et Saintré ou meillieu des siens. Les deffenses furent criées ; chascun Françoys, qui tenoit sa bannerolle en samuin, en fist un grant signe de la croix, puis la baisa et la bailla. Lors chascun, armé de ce qu'il d^voit, prent sa peusine en sa main senestre, lors baissa sa visière, et sa lance de gect en sa dextre main, et en très belle et joieuse contenance, les ungs devant les aultres, jusques au commander de l'empereur qu'ilz feissent leurs devoirs, et que on les laissast aller. Alors, tant d'ung cousté comme d'aultre, desmarchans comme lions, à l'assembler et gect de lance, deux Françoys furent blessiez, mais non de chose de quoy ilz laissassent à besongner, et trois des Allmans, dont l'ung eut le pié percé. Lors commença la bataille si fiere et si dure
que c'estoit merveille, et tousjours fut combattue sur la partie des Allmans, que pour tel nombre de gens oncques semblable ne fut, qui dura moult longuement; en laquelle le seigneur de Saintré avoit jà son compaignon desmarché fort arrière. Quant l'empereur veit la vaillance de ces gens, ou que l'ung party ou l'aultre falloit que rompist, alors s'escrya, et dist : « Helas ! où estoit mon cueur de souffrir ung tel inconvénient ? » Lors hastivement gecta sa flesche, en disant : « Hol » Lors furent tous prins et tirés chascun party à son pavillon. Adonc l'empereur les fist tous devant luy venir, et de leurs chiefs et gantelets desarmer, et ordonna faire appareiller les blessez; puis fist demander à tous les vingt compaignons leurs prix qu'ilz dévoient payer l'ung à l'aultre, s'ilz eussent perdu, lesquels luy furent apportez. Lors les bailla au roy d'armes de l'empire, et ordonna rendre à chascun le sien, et de sa part leur dire les parolles qui s'ensuyvent.
